arfanniarneq
Tikaagullittassat ammaanneqarput
Kitaani Tunumilu tikaagullittassat sinneri decembarip tallimaannit 2014 atuutilersumik tamanut ammaanneqarput
Kalaallit Nunaata Kitaani tikaagulliit qamutilimmik tuukkartalimmik pisassat 16-it qoorortoorsornermilu pisassat marluk kiisalu Kalaallit Nunaata Tunuani tikaagulliit qoorortoorsorluni pisassat sisamat 27. november 2014-imi suli pisarineqarsimanngillat. Namminersorlutik Oqartussanit tusagassiorfinnut nalunaarummi allassimavoq.
Pisassiissutigineqartut tamakkerneqarnissaat qulakkeerniarlugu, Naalakkersuisuusimasunit allaffissornikkut piginnaatitsissummik tunngaveqartumik, Aalisarnermut, Piniarnermut Nunalerinermullu Naalakkersuisoqarfik aalajangiivoq 5. decemberimiit 2014-imi atuuttumik tikaagulliit 18-it pisassiissutigineqartunit sinneruttut Kalaallit Nunaata Kitaani kommuninut sisamaasunut ammaanneqassasut tikaagulliillu sisamat 5. decemberimiit 2014-imi atuuttumik Kalaallit Nunaata Tunuani aqutsiveqarfinnut marlunnut ammaanneqarlutik, naalakkersuisoqarfik tusagassiorfinnut nalunaarutikkut paasissutissiivoq.
Angallatit taamatullu ataatsimoorluni piniarnermut peqataasut tikaagullinniarnermik ilisimasaqarluartut nalunaarutini kinguliiniittuni piumasaqaatit malillugit 1. apriilimiit 31. decembarimut piniarsinnaapput.
Piniarneq siulersortimik akuersissummik pigisaqartussamik aqunneqassaaq, taassumalu aamma akisussaaffigaa pisap kommunimut angerlarsimaffimmut nalunaarutigineqarnissaa, tusagassiorfinnut nalunaarummi allassimavoq.