Piniarneq
Tikaagullinnik arfivinnillu pisassiissutit tamanut saqqummiunneqarput
2016-imi tikaagullittassat arfivittassallu nunap immikkoortuinut qanoq agguataarneqarnerat takukkit
Pisassiissutinik agguataarisartut KNAPK-mit, Kanukokamit aamma Aalisarnermut, Piniarnermut Nunalerinermullu Naalakkersuisoqarfimmit ilaasortaaffigineqartup arfivinnik tikaagullinnillu pisassiissutit agguataarpai, tamannalu aalisarnermut piniarnermullu naalakkersuisumidt Karl-Kristian Krusemit (S) akuersissutigineqarpoq.
Kitaani tikaagullittassat katillugit 179-iupput, taakkunannga 15-it 2015-imi pisassiissutinit pisarineqanngitsunit ingerlateqqitat.
Arferit 134-it
Arfattassat 134-t angallatinit qamutililinnit piniarneqarsinnaapput, 45-ullu ataatsimut piniagassatut tunniunneqarlutik. Angallatit ataatsimullu piniagassiissutinik piniaqataasut, tikaagullinniarnissamut piumasaqaatinik ataani allassimasunik naammassinnittut, piniarsinnaapput marsip aallaqqaataaniit novembarip 30-annut.
Tunumi pisassiissutit 15-iupput, taakkunannga pingasut 2015-imi pisassiissutinit pisarineqanngitsut ingerlateqqitat. Tunumi piffissaq piniarfissaq Kitaanisut ippoq.
Qeqertarsuup Tunua pingaarnerutillugu
Kitaani arfivittassat sisamaapput, taakkunannga marluk 2015-imi pisassanit pisarineqanngitsut ingerlateqqitat. Pingaartumik angallatit Qeqertarsuup Tunuaneersut, arfivinniarnissamut teknikkikkut atortutigut akuerineqarsimasut, apriilip aallaqqaataaniit decembarip 31-annut piniarsinnaapput.
Siunniunneqarpoq pisassat sinneriumaagaat kommunerujussuit namminneq agguataaqqissinnaassagaat, soorlu aalajangiinissamut killissalerlugu, tunngavissaatillugu pisat tamarmik amerlassusaat aqunneqassasoq, pisassat paggatsitsissutigineqassanngitsut, aammalu agguaasseqqinnerit pillugit Namminersorlutik Oqartussat qanimut ilisimatinneqassasut. Manna tikillugu pisinnaatitaaffimmisut Naalakkersuisup pisassat kommininut ataasiakkaanut agguaateqqissinnaavai.
IWC aalajangiisuuvoq
Kalaallit Nunaat arfernik angisuunik pisassinneqartarpoq Den Internationale Hvalfangstkommissionip (IWC) siunnersuinera naapertorlugu, taannalu pisassiissutinik aalajangiinissaminut pisinnaatitaavoq. Ukiut pisassiiffiusut tamarmik imatut nalilersorneqartarput, ukiumut pisassiiffiusussaq pisassiissutissatut siunnersuummut nutaamut, taamaattumik peqarpat, pisassiissutinillu qaangiisimasinnaanermut naleqqussarlugit.