Tibetimut tapersersuisoq aalajangiusimavoq: Ingerlanissannut qinnuigineqarpunga

Naalakkersuisoqarfimmi pisortap nassuiaataa Jan Joe Seidsenip ilumuunnginnerarpaa

Tibet pillugu isummanik siaruarterisup Jan Joe Seidsenip, aggustimi Katuami kinamiut filmfestivaaleqarneranni ammaanersiornermi, Nunanut Allanut Pisortaqarfimmi atorfilittat peqataasinnaaneranik oqaaseqarsimanerat ilumuunnginnerarpaa.

- Siullertut naalakkersuisoqarfimmi periaasissanik aqutsisuunerup ornippaanga, aaqqissuussamiillu ingerlaqqullunga, qupersakkanik agguaanera tulluanngitsoq isumaqarami, Jan Joe Seidsen, Sermitsiaq.AG-mut oqarpoq.

- Maaniissinnaatitaallunga akivara.

Jan Joe Seidsen ‘Free Tibet’-mik allagartalimmik tujuuluaralerluni aamma erfalasulerlunilu quppersakkanik agguaassivoq.

Katuami sulisoq kingorna aggertinneqartoq taassuma oqaluttuaraa – tassanilu aamma aaqqissuussamit ingerlaqquneqarluni. Ingerlatissagunikku politiinik aggertitsisariaqartut, Jan Joe Seidsen, tamatumunnga akissuteqarpoq.

- Minutsit 15-t missaat qaangiuttut naalakkersuisoqarfimmi pisortaq Kenneth Høegh uannut aggerpoq, oqaatigissallugu qissigusunnartumik inissisimalersikkikka oqaatigaa, aaqqissuussamillu ingerlasinnaannginnersunga aperivoq. Politikkikkut aaqqissuussaanngitsoq oqatigaa.

Jan Joe Seidsenip oqaloqatigiinneq inussiarnersumik pisoq oqaatigaa, aammami aaqqissussaamit ingerlatinneqanngilaq.

Jan Joe Seidsenip akerliussutsimik takutitsinera tulluanngitsutu isumaqarfigineqartoq, kisianni tassaniissinnaatitaasoq aamma ataqqineqartoq, naalakkersuisoqarfimmi pisortap Kenneth Høeghip Sermitsiaq.AG-mut oqaatigaa.

- Tassaniissinnaatitaaninnut oqaatsit – imaluunniit assingusut – oqaatigineqarpat?

- Naagga, oqaatigineqanngillat.

- Kisiannimi ingerlatinneqanngilatit. Oqaasertaliinani taava akuersaartoqarnera tassani pineqarpa?

- Aap, taamatut oqartoqarsinnaavoq.

Powered by Labrador CMS