Thomsen: Aningaasanut inatsit anguniagaqanngippallaaqaaq

Aningaasanut inatsisissatut siunnersuutigineqartoq maannatut isikkoqartillugu amerlanerussuteqartunit ilalerneqarsinnaanngilaq. Naalakkersuisoqatigiit tapersersortaasa - Demokraatit - partii siunnersuummut akuersissappat aningaasaqarnerup iluani aaqqissuusseqqinnissanik annertuunik piumasaqarpoq.

Demokraatit siulittaasuata Niels Thomsenip Naalakkersuisut aningaasanut inatsisissatut 2019-imut siunnersuutaat naammagisimaanngilaa.

Anguniagaqanngitsoq

- Naalakkersuisut aningaasanut inatsisissatut siunnersuutaat angusaqarluarnissamut tunngavissiinngitsutut isigaarput aamma politikkikkut namminiilivikkusunnitsinnut naapertuutinngilaq, angusariaqaratsigumi aningaasarsiornikkut imminut napatinnissaq.

- Isumarput allanngornikuunngilaq. Naatsorsuutigaarput pingajussaaneerneqannginnerani allannguutissanik siunnersuuteqartoqassasoq pisortat allaffissornerata sipaarfigineqarnissaanut pitsanngorsaavigineqarnissaanullu imalinnik. Taakku sipaarutit pitsanngorsaanerillu annertussapput pilersitsisinnaassallutillu milliuunerpaalussuarnik. Tamatumap kinguneranik aningaasanut inatsisissap pingajussaaniilerutsigu takusinnaasariaqarparput 2019-mut ukiunullu missingersersuusiorfiusunut milliuunerpassuanik sinneqartooruteqassalluta, Niels Thomsen oqarpoq.

Akileraartarnermi akitsuusersuisarnermilu kiisalu inunnik isumaginninnermi iluarsartuussisoqarnissaa, Niels Thomsenip tikkuarpaa, taamaaliornikkut “sulineq akilersinnaajuaannartariaqarmat”.

Uuliasiornissamut aningaasaliissutit peerneqassapput

Inatsisissatut siunnersuutigineqartup aappassaaneerneqarnissaanut Inuussutissarsiornermut Nukissiuuteqarnermullu Naalakkersuisoqarfimmut 48 milliuunit koruuninik aningaasartaqartut, nunami uuliasiornissamut aningaasaliissutigineqarsimasut, Naalakkersuisut peersimanngilaat.

Aningaasat milliuunilikkaat naalakkersuisoqarfimmit peerlugit timersornermut atorneqassasut, Niels Thomsen isumaqarpoq.

- Timersorneq innuttaasut peqqissunngortinnissaannut sakkussani pitsaanersaavoq, tamatumallu kingunerissuaa peqqinnissaqarfimmi aningaasartuutikinnerulernissaq. Tamanna tunngavigalugu Demokraatini timersorneq isigaarput tamatta siunissatsinnut aningaasaliinissatut, Niels Thomsen naqissusiivoq.

Akisussaassuseqarneq ujartorneqarpoq

Ukiuni aningaasakilliornerusuni sillimmatissanik aningaasanik illuartitsisoqartarnissaa Niels Thomsenip piumasaraa.

- Nunatta ikummatissat akiinut aamma nunap aningaasaata nalinganut atavoq. Taakku uagut aqussinnaanngilagut. Taamaammat pitsaasumik aningaasanut politikkeqartariaqarpugut, Niels Thomsen oqarpoq. Taanna isumaqarpoq politikkikkut suliniutissat pillugit politikerit ganngimi naapikkaagamik isumaqatigiilluartartut, Inatsisartulli ataatsimiittarfiannut iseraangamik akisussaaffitsik puigortaraat.

Powered by Labrador CMS