'Ísland Got Talent'
Thelma pakatsillunilu tulluusimaarpoq: Siunissami tusarfigeqqikkumaarpassinga
'Ísland Got Talent'-imi ajugaaniunnissamut Thelma Kajsdóttir Lyberth ingerlaqqinngitsoorpoq sapaatiummat
Piginnaanillit Islandimi unammisinneqarneranni peqataasoq, Thelma Kajsdóttir Lyberth, ajugaaniunnissamut ingerlaqqinniunnermi ingerlaqqinngitsoorpoq, Kalaallit Nunaannullu utilerluni.
19-nik ukioqartoq Thelma Kajsdóttir Lyberth taamaasilluni 'Islands Got Talent'-imi tusarnaartitseqqissanngilaq.
Sms-ikkut Kalaallit Nunaannit taasisoqarsinnaanera Thelma Kajsdóttir Lyberthip neriuutigigaluarpaa, aaqqisuisuniimmi tamanna pisinnaasoq oqaatigineqaraluarpoq.
Thelma Kajsdóttir Lyberthip Facebookimi quppernermini ima allappoq:
- Appiliivillarlungalu tusarnerlukkama paasitinneqarlunga kalaallit nunaanniit taasisoqarsinnaanngitsoq, qiallunga tupaqqamut scenemukariartorpunga tassanngaanarnermut. Ajoraluartumillu pissanganerlullunga appippunga ingerlaqqinnangalu. Island got talent taanna kukkussutigivaat taasinissaq pillugu. Kisiat aliasunnianngilanga pissutigalugu matunik ammaasereermat ilinniutaallunilu. Aqagu aallartussanngorpunga.
Qujassuteqartoq
- Qujanaq tapersersuinissinnut! Assut tuppallernarpoq qujanaq, Thelma Kajsdóttir Lyberth Facebookikkut allappoq.
Anaanaa, Edda Lyberth, islandermiuuvoq ataataalu Kaj Lyberth kalaaliuvoq nipilersortarnerminut ilisimaneqartoq.
29-nik ukiulik Qaqortormiu Hans-Peter Bay 'Island Got Talent'-imi ingerlaqqinniunnermi siullermi ingerlaqqippoq. Unammeqataaqqikkamili ingerlaqqinngitsoorluni.