Sisimiut
Terissat tamanut siaruaapput
Sisimiuni teriarpassuaqarneranit ilaqutariippassuit eqqugaapput, misigisimappullu pitsaanerusumik sullinneqarsimasinnaagaluarlutik
Sisimiuni inissiarsuaq Aqqartarfik 2 kisimi teriarpassuarnit eqqugaanngilaq. Inissiaqarfiit allat ajornartorsiummit tassannga aamma pulaffigineqarsimapput. Pullatini teriartarneq ulluinnarsiutaavoq pappilissanillu pullatit nutaat ilaatigut atorneqarput.
Inissiarsuaq sanilia Aqqartarfik 3 aamma terianissimavoq. Najugaqartut ilaat aterminik saqqummiusserusunngitsoq Sermitsiaq.AG-mut oqaluttuarpoq ukiup ataatsip ingerlanerani 30-nik teriarsimallutik.
- Unnuit tamaasa ikkat iluini terissat tusaasarpagut viceværtimilli paasitinneqarpugut terissat pisarineqareerpata putut aatsaat milissorneqarumaartut, najugaqartoq oqarluttuarpoq.
Taakku toqqissisimanngillat ilaqutariit mikisunik meerartaqaramik.
Papæskit toqunartullit
Najugaqarfiit terianittut ilagaat Kussangasoq Aqqartarfimmiit illoqarfimmi isuata aappaaniittoq. Inissiat taakku eqqaavissuup ungasinngisaaniipput maannalu terianissimallutik uanilu sapaatip akunnerata naanerani najugaqartut ilaat aterminik saqqummiusserusunngitsoq pingasunik teriarsimavoq.
Najugaqartoq oqaluttuarpoq A/S Inissiaatileqatigiit Inimit ikiuutigineqartoq tassatuaasoq papæske pullatitut sanaaq nutaaq.
Papæskep iluaniittoqarpoq terissat nerisassaannik. Ilitsersuut malillugu ullut marluk pingasut qaangiunneranni terissat tamanna toqussutigisussaavaat.
- Maanna magiaarpalunneq ullut arlallit qaangiunneranni tusarsaajunnaarpoq, najugaqartoq oqaluttuarpoq.
Najugaqartoq oqaloqatigineqartut kikkuuneri aaqqissuisoqarfimmit ilisimaneqarput.
Ujaasineq.
Terissat pillugit ajornartorsiuteqarpit? Aaqqissuisoqarfik attavigisinnaavat redaktion@sermitsiaq.AG aqqutigalugu.