Teologi neriumajunnaartoq
Teologi suliffeqanngitsoq neriumajunnaaqqilerpoq
Portu Qisuk, Narsami Qaanaamilu palasitut atorfinnut qinnuteqarsimasoq, akissutisisimannginninili pissutigalugu qinnuteqaamminik tunuartitsisimasoq, neriumajunnaaqqilerpoq
Portu Qisuk, teologitut ilinniagaqarsimasoq, Danmarkimilu najugalik, sapaatiummat pingajussaa neriumajunnaalerpoq, neriuutigalugu Kalaallit Nunaanni palasisut atorfinitsitaannginnerminut nassuiaateqarfigineqarnissani.
Portu Qisuup, siusinnerusukkut Arne Ib Nielsenimik ateqarsimasoq, ukiut marlussuit matuma siornatigut aqqi allanngortippaa.
Taanna ukiut arfineq-marluk ingerlanerani Kalaallit Nunaanni sumiiffinni assigiinngitsuni palasitut atorfinnut qinnuteqartarsimavoq. Sulili iluatsitsisimanngilaq.
Parisimi qallunaat aallartitaqarfiata saavani
Portu Qisuk sapaatiummat pingajussaa neriumajunnaalerpoq, tamatumuuna qallunaat Parisimi aallartitaqarfiata saavani, taannalu nakkutigeqqissaarneqarpoq qanittukkut Frankrigimi peqqarniitsuliortoqarnera pissutigalugu.
– Place Charles de Gaulle-miippunga. Qallunaat aallartitaqarfiat nakkutigeqqissaarneqarpoq, taamaattumik sivikitsuinnarmik silataaniippunga. Neriumajunnaarneq aallartereerpoq silageqaarlu, Portu qisuk Sermitsiaq.AG-mut oqaluttuarpoq.
Portu Qisuup ilanngullugu oqaluttuaraa Frankrigip kujataani juullisioreerluni Danmarkimut utereriartorluni, taamaattumillu aalajangersimalluni neriumajunnaarnissani Parisimi aallartinniarlugu.
Itigartinneqartarpoq
Portu Qisuk Kalaallit Nunaanni sumiffinni assigiinngitsuni 15-ini palasitut atorfinnut 15-inut qinnuteqartarsimavoq itigartinneqartarsimallunilu, tamatumalu kingorna atorfiit qinnuteqarfii arlallit inuttassarsiorneqaqqittarsimapput.
– Sisamanngorpat unnukkut imertorunnaassaanga nassuiaaffigineqanngikkuma sooq atorfinitsitaasinnaannginnersunga. Biskoppip iluuseqarneratigut inuttut immikkoortinneqarsimavunga, tamannalu nikassaaneruvoq, Portu qisuk oqarpoq.
Portu Qisuk aamma 2010-mi marloriarluni neriumajunnaarnikuuvoq. Siullermik 2010-mi januaarimi aappassaanillu ukioq taanna decembarimi.
Portu Qisuup nunatsinni palasitut atorfinissinnaannginnini pillugu Tamanut Kujataani oqaluttuarnera aamma atuarsinnaavat.
Tamanut Kujataani akeqanngitsumik ugguuna aasinnaavat: