Telemi pisortaq amigartoortitsinermut pasilliutigineqarnini taamaateqquaa

- Amigartoortitserujussuarnermut siornatigut pisuusimaninnut pasiulliutit Per Rosing-Petersenip utertissavai. Imaluunniit uppernarsartariaqarpai, Kristian Reinert Davidsen oqarpoq

Partii Naleqqap Inatsisartunut ilaasortaatitaata, Per Rosing-Petersenip, Savalimmiuni suliffeqarfimmi amigartoortitserujussuarsimasutut pisortamut pasilliinerata kingorna, Tele-Postip pisortaanera, Kristian Reinert Davidsen, sakkortuumik akerliliivoq.

Politikerip Naalakkersuisut aperai, qanoq ililluni taanna pisortaq tamatuma kingorna ingerlatseqatigiiffimmut Namminersorlutik Oqartussanit pigineqartumut sulilersinneqarsinnaanersoq. Kisianni Per Rosing-Petersen paragraf 37 naapertorlugu apeqquteqarnermini uppernarsaatinik saqqummiussaqanngilaq.

Uppernarsaatinik saqqummeeqqusisoq
Kristian Reinert Davidsen maanna pasillerneqarnini taamaateqqullugu piumasaqarpoq, imaluunniit Per Rosing-Petersen uppernarsaatinik saqqummiusseqquaa.

- Per Rosing-Petersenip Savalimmiuni suliffeqarfinni amigartoortitserujussuarsimaninnut pasilliissutini uppernarsassagaa imaluunniit utertissagaa sakkortuumik kajumissaarutigaara. Ukiuni qulingiluani kingullerni Føroya Telemi pisortaaneruvunga, tassanilu annertuunik angusaqarnikuuvunga, Kristian Reinert Davidsen, Sermitsiaq.AG-mut oqarpoq.

Føroya Tele
Pisortaaneq decembarimi 2015-imi atorfinitsinneqarpoq, Føroya Telemilu pisortaanertut atorfimmit aggersuuvoq, 2006-imili tassani atorfeqarsimavoq.

Ingerlatseqatigiiffiullugu ukiumut naatsorsuutai kingulliit 2015-imeersut qiviaraanni amigartoornernik takusassaqanngilaq.

Suliffeqarfik 29,8 millionit koruuninik sinneqartoorsimavoq, ukiullu siuliani 58,3 millionit koruuninik sinneqartoorluni. Ukiunilu tallimani kingullerni sinneqartoorutit taama annertutigipajaartarsimapput.

Aningaasaliinermit annaassaqarneq
Savalimmiunili suliffeqarfik 2009-mi 32,1 millionit koruuninik amigartooruteqarsimavoq. Kisianni Kristian Reinert Davidsenip tassunga tunngatillugu naqissuserpaa, tamanna IT-mik ingerlatseqatigiiffimmut aningaasaliinermi annaasaqarnermik pissuteqartoq, tamannalu Føroya Telep ingerlatsineranit akilersinneqarsimasoq.

- Aningaasaliissuteqarnermit annaasaqarneq amigartoornermut pissutaavoq, ingerlatseqatigiiffiup ingerlanneqarneranit amigartoorutaanani, Kristian Reinert Davidsen ilisimatitsivoq.

Powered by Labrador CMS