Telemi pisortaaneq pisortanik avataanit aallerpoq

Tele-Postimi pisortaanerup Kristian Reinert Davidsenip pisortanik marlunnik atorfinitsitsinermigut suleqatissani maanna inissippai.

Sulisoqarnermut pisortaq nutaaq
Helena Rotvig Kristiansen, 2008-mili Royal Arctic Linep Sulisoqarnermut immikkoortortaqarfianut akisussaasimasoq, Karl-Henrik Simonsen kingoraarlugu sulisoqarnermut immikkoortortaqarfimmi aqutsisuulissaaq 2016-imi apriilip aallaqqaataaniit.

Taanna KNR-imi pisortatut atorfinikkami taamaatippoq.

Atuaruk: Karl-Henrik Simonsen KNR-imi pisortanngussaaq

- Niuernikkut pilersaaruterput ingerlassinnaajumallugu sulisugut ineriartortissavagut, aamma Tele-Postimi suliassanik ingerlatsisussat maani nunallit piginnaasaannik ineriartortitsineq ukiuni aggersuni ingerlanniarparput, Kristian Reinert Davidsen tusagassiuutinut nalunaarummi erseqqissaavoq.

Avataanit tikisitaq
Brian Smedemark suliaqarfimmi nutaami, tassalu nioqqutinut nittarsaassinermullu immikkoortortaqarfimmi, pisortanngussaaq. Brian Smedemark savalimmiormiu 35-nik ukiulik, Føroya Telemi aningaasaqarnermut pisortatut atorfeqarsimavoq.

Taanna suliffimmini nutaami aallartissaaq kingusinnerpaamik juunip aallaqqaataani.

- Brian naliliillaqqittorujuuvoq aamma tunisassiassanik ineriartortitsillaqqippoq, taassumalu sullitatsinnut iluaqutaasussamik nioqqutitta pitsaanerunissaannik pisariinnerunissaannillu anguniagaqarnitsinnik suli annerusumik qanillattuutissavaatigut, Kristian Reinert Davidsen erseqqissaavoq.

Atuaruk: Tele-Postimi soraarsitsinerit