Tele Tunumi unammilligassaqarpoq

– Siullermik erseqqissarusuppara Tunu nunap sinneratulli sullinneqartoq. Attaveqarneq sammisorujussuuvarput, ajoqusernerillu allanngortitsinerillu pillugit atuisartutsinnik paasissutissiisarnivut ataavartumik pitsanngortinniarsarivagut. Kingullermik Kulusummi ajoquserneq pillugu ajoraluartumik ingerlatsineq pillugu naammattumik nalunaaruteqartoqanngilaq.
Taamatut akineqarpoq Kulusummi innuttaasup maani Sermitsiaq.AG-mi tunumi telefonikkut attaveqaatip kipisaqattaartarneranik Tele Greenlandillu paasissutissiisannginneranik isornartorsiuinera. Isornartorsiuinermut akissuteqartuuvoq Tele Greenland A/S-imi teknikkikkut pisortaagallartoq Kim Schwartz.
– Inuilaami stationeqarfimmit DYE4-mit Kulusummut attavimmik piffissap ilaani ajornartorsiuteqarsimavugut. Ajoqut piffissap ilaannaani takkuttarmat taanna sumiissusersiuminaatsissimavarput. Isumaqarpugut ajoqutaasoq nassaarisimallugu, taartissamaatilu Kulusummut ingerlanneqarput. Tamanna pissutigalugu telefoninut aalajangersimasumik attavilinnut, mobilinut internettimullu attaviit naatsumik kipisarsimapput, Kim Schwartz nassuiaavoq.
Neriorsuivorlu Kulusummi GSM-imik sullissivimmi annertussutsikkut ajornartorsiutit pitsanngorsarneqassasut, ajornartorsiutilli teknikkimik pissuteqanngitsut.
Attaveeruttarnermut pinngortitaq aamma pissutaaqataasarpoq.
– Ajornartorsiut aaqqinneqassaaq naatsorsuutigineqartutut Kulusummi attaveqaammik 3G-mik pilersitsinissamut atatillugu, pilersaarutillu malillugit taanna oktobarimi atulissaaq. Aamma Kuummiuni DVB-T-mik aallakaatitsissutip sarfalersorneqarnera arlaleriarluni aserortarsimavoq innaallagissap aqqutaani transienter-it (atortut malussajasut, aaqqiss.) pissutigalugit. Innaallagissamik pilersuummik atasinnaanerusumik piniarsimavugut, taannalu piaarnerpaamik ikkunneqassaaq. Upernaarli aamma tamaani amerlasuunik anorersuartarsimaqaaq, arlaleriarluni inuilaami stationeqarfitsinni parabolit sangutinneqartarsimallutik, taamaasilluni nunaqarfinnut attaviit kipitinneqartarlutik, Kim Schwartz nassuiaavoq.
Aamma atuaruk: Haluu, inoqarpa?
Ilanngullugu nassuiaavoq mobilit attaveeruttartut illoqarfimmi nunaqarfimmiluunniit innaallagiaq qamittooraangat. Tamatumunnga pissutaavoq mobilinut aallakaatitsiviit sarfatortorujussuunerat, taamaattumillu mobilinut aallakaatitsiviit tamaasa ajornartoornermi sarfalersornissaat akisoorujussuulluni, Tele Greenland A/S oqarpoq.