binzerip soraarnera
Tele-Postip siulittaasuata Binzerip soraarniuteqarnera paasisinnaanngilaa
Suliffeqarfimmut suleriusissat Michael Binzerip ukiortaami saqqummiuppai. Tele-Postimi aqutsisut tamarmik isumaqatigiissutigaat, Tele-Postimi siulersuisunut siulittaasoq Agner N. Mark oqarpoq
- Michael Binzerip soraarniuteqarnissaa neriuutiginagulu kissaatiginikuunngilarput, Tele-Postip siulersuisuinut siulittaasoq Agner N. Mark Sermitsiaq.AGmut oqarpoq.
Siulersuisunut siulittaasup Binzer nersualaarpaa.
- Soraarsitsisoqanngilaq. Michael Binzerip aalajangernini nammineerluni aalajangigaraa. Tamanna ataqqivara, siulersuisunut siulittaasoq Agner N. Mark oqarpoq.
- Malunnarpoq aalajangiineq paasisinnaanngikkit. Tatigineqarunnaarsimanini pissutigalugu soraarniuteqarluni nassuiaavoq, taama oqaaseqarnera nassuiarsinnaaviuk?
- Aap, eqqorpoq tupaqqasunga. Michael Binzerip soraarniuteqarnera paasisinnaanngilara. Suleqatigiilluarpugut. Michael Binzerip Tele-Postip ukiuni tallimani tulliuttuni suleriaasissaa suliaraa, tamanna siulersuisunit akuersaarneqarlunilu isumaqatigiissutigineqarpoq, Agner N. Mark oqarpoq.
- Naalakkersuisunit tatisimaneqarpisi?
- Naamik. Siulersuisuni ataatsimeeqatigiikkaanngatta attaveqartarnernilu suliffeqarfiup ingerlanneqarnera iluarisimaarneqartoq malugisarparput. Aamma akinik appaanerit, telep siunissami suleriaasissaat pilersaarutigineqartullu isumaqatigineqartarput, Agner N. Mark oqarpoq.
Michael Binzerip Tele-Postimi pisortaanertut soraarniuteqarsimalluni pingasunngornermi tusagassiutinut nalunaarutigaa.
- Uanga piginnaatinneqarsimavunga siunissamut iliuusissatut pilersaarutip anguniaqarluarfiusup suliarineqarnerani siuttuunissannut. Ajuusaarutigaara uanga atorfinnit soraarniuteqarnera, kisianni misigisimavunga uannut tatiginnittoqarunnaartoq, uanga isumara malillugu tamanna pisariaqarpoq ingerlatsiviup aqunnissaanut aamma siunissamut iliuusissatut pilersaarutip naammassineqarnissaanut, tusagassiutinut nalunaarummi Michael Binzer oqarpoq.
Sermitsiaq.AGp Michael Binzer attaveqarfigigaluarpaa, inuttaatali itisilerusunngilaa sooq soraarniuteqarnerluni.
Pisortap tullia Steen Montgomery-Andersen pisortaanerugallartutut inissippoq.
Tele-Postimi pisortaanertut apriilip aallaqqaataani 2013-mi atorfeqalerpoq.