Tele-Postip siulersuisui sooq taarserarneqarnersut Aleqap nassuiarpaa

Tele-Postip siulersuisuisa ataatsimiinneranni Line Frederiksen Aaja Chemnitz Larsenilu siulersuisuni ilaasortaajunnaarsinneqarput.

Siulersuisut taarserneqarsimanerat Naalakkersuisut siulittaasuata Aleqa Hammondip nassuiarpaa:

- Suliffeqarfimmik piginnittut qaqugukkulluunniit siulersuisunik taarsiisinnaapput. Siulersuisuni ataatsimiittoqaraangat siulersuisuni taarsiisoqartarnera takornartaanngilaq, taamaattumillu Tele-Postip siulersuisuini taarsiisoqarpoq.

- Siulersuisuni ilaasortaasuni sisamaasuni marluk taarserneqarnissaat aalajangerpara. Siulersuisuni ilaasortaalersut inuiaqatigiinni ilisimasaqarluarput, sulerusussuseqarluarlutik inuiaqatigiinnullu sunneeqataasinnaalluarlutik. Siulersuisuni nukinnik nutaanik tunineqarpoq, tamannalu siuarsaataassaaq, Aleqa Hammond oqarpoq.

Paneeraq Olsen Qeqqata Kommuniani pisortaasoq, Edda Lyberthilu Greenland Sagalandsimi Qaqortumiittumit pisortaasoq siulersuisuni ilaasortanngortinneqarput.

- Line Frederiksenip Aaja Chemitz Larsenillu siulersuisuni angusaat nuannaarutigaavut, siulersuisunilu ilaasortaanerminni sunniuteqaqataalluarsimallutik, Naalakkersuisut siulittaasuat oqarpoq.

- Aaja Chemnitz Larsen ukioq ataasiinnaq siulersuisuni ilaasortaasimasoq siulersuisuni pitsaasumik angusaqarsimanera qanoq oqaaseqarfigisinnaaviuk?

- Siulersuisuni ilaasortat qaqagukkulluunniit taarserneqarsinnaapput, aamma ukiumi ataatsimi ilaasortaasimagaluaraanniluunniit. Aaja siulersuisuni suleqataalluarpoq, tamanna ukiumi nalunaarummi takuneqarsinnaavoq, taamalu angusaqartoqarsimanera nuannaarutigaarput. Siulersuisuni ilaasortat aallartitaraavut, Aleqa Hammond nassuiaavoq.

Naatsorsuutitigut angusat akileraaruteqannginnermi 2013-imi 94,3 million koruuninik annertussuseqarput, piginnittunullu agguagarsiat 47 million koruuniullutik.