unikaallatitsineq
Tele-Postip paasissutissiinissaa Knud Kristiansenimit utaqqimaarneqarpoq
Attaveqarnermut naalakkersuisup Knud Kristiansenip Tele-Postip sullissinermi namminersortunngorsaanissamut kinguartitsinera ilisimasimallugu nalunaaruteqarpoq, ilisimatsitsissuteqarnissaminulli pisariaqartitsisimanngilaq
Naalakkersuisutut akisussaaffeqarfini isornartorsiorneqaraluartut Knud Kristiansen pisarnermisut oqaaseqarusuppallaanngilaq. Attaveqaatitigut unammilleqatigiittoqarnerulernissaanik Tele-Post sulissuteqanngitsuusoq politikkerinit unammillertaasuniillu isornartorsiorneqarpoq.
Naak Knud Kristiansen tusagassiuutinut oqaaseqarpallaartanngikkaluartoq, KNR-ip pisoq pillugu oqaluuppaa. Attaveqaatinik atuinermi namminersortunngorsaanissamut periarfissanik misissuinerup Tele-Postimit unitsinneqarsimanera pillugu oqaaseqartinneqarpoq. Attaveqaatinik unammilleqatigiinnerulernissaq apriilip aallaqqaataani atuutilersussaq siunnerfigineqarnikuugaluarpoq.
Tele-Postip misissuinerminik unititsiinnarsimanera Knud Kristiansenimit ilisimaneqarpoq, kisianni tusagassiuutinut Inatsisartunulluunniit tamanna nalunaarutigissallugu pisariaqarsimanngitsoq oqaatigaa.
- Isumaqarpunga piaarpallaartoq maannamut taakkua isummerfiginissaanut, KNR-imut oqarpoq. Pisoq pillugu iserfiginiarnagu oqaatigaa, tassami Tele-Postimit ilisimatitsisoqarnissaa utaqqimaarpaa.
Ilisimatitsinissat IA-mit utaqqimaarneqarput
Knud Kristiansenip nassuiaataa Inuit Ataqatigiinnit Naaja Nathanielsenimit tupigusuutigineqarpoq. Naaja Nathanielsen Tele-Post pisumut isornartorsiortareerpaa.
- Kinguaattorneq tusagasiutitigut tusareeratsigu inatsisartut paasissutissinneqassasut naatsorsuutigaara. Naalakkersuisut tullinnguullugu qanoq iliorniarnerlutik oqaluttuutissagaatigut piumasaraarput. Naalakkersuisoq akissuteqassasoq naatsorsuutigaara, Naaja Nathanielsen KNR-imut oqarpoq.
Attaveqarnermut naalakkersuisup angalanera pissutaalluni pisoq pillugu oqaaseqarsinnaanngitsoq Sermitsiaq.AG-mut nalunaaruteqartoqarpoq.