sinneqartoorneq
Tele-Postip isertitai ikileriartut
Suliffeqarfik Namminersorlutik Oqartussanit pigineqartoq 2014-imi 68,9 million koruuninik sinneqartoorpoq
Tele-Postip aningaasaqarnikkut missingersuutaani angusaqarluaqqippoq.
Tassami suliffeqarfik 2014-imi angusai 68,9 million koruuniupput taakkulu 2013-imi angusanit 25,4 million koruuninik appasinnerupput.
Piginnittut pissarsiassaat 32,0 million koruuniussapput, taakkulu akileraarutit ilanngaatigereerlugit ukiumi angusat 69 procenteraat, tamanna tusagassiutinut nalunaarutigineqarpoq.
Naatsorsuutigineqartumit ajornerusoq
- Ukiumi anguneqartut missingersuusiarineqartuniit ikinnerupput. Mobiltelefoneqarnermut, internetimut aamma paasissutissanut kiffartuussissutinut akit malunnaatilimmik appaaviginerisa kinguneraat naatsorsuutigisatsinnut naleqqiullutik kaaviiaartitat appangaatsiarnerat.
- Taamaakkaluartoq angusaq suli naammagisimaarparput. Ukioq 2014 ukiuusimavoq ’Sassarta 2014-18’-imik ingerlatsivik siulleq, suliniutillu amerlasuut aallartinneqarput, Tele-Postimi pisortaanerugallartoq Søren Lennert Mortensen tusagassiutinut nalunaarummi oqarpoq.
Sulisut amerlaneusut
Tele-Post missingersuusiarineqartunit aningaasartuuteqarnerusimavoq pilersaarutaasimasumit amerlanerusunik sulisoqarneq pissutigalugu.
Tamatumunnga ilannguttariaqarpoq namminersortunngorsaanermik suliaqarnerup piumasaqaateqarfiusimanera aammalu ingerlatseqatigiiffimmut aningaasartuutitigut annertuumik malunnarsimanera, siunnersortinullu avataaneersunut aningaasartuuterpassuarnik kinguneqarsimanera.
Tele Greenland A/S ataatsimeersuassaaq Nuummi pingasunngornermi maajip 27-ani.