Tele-Postip AWG2016-imut nipitittagaq saqqummiuppaa

Arctic Winter Games 2016 Nuummi pisussaq ullut 410-t qaangiuppata aallartissaaq.

Tassunga atatillugu Tele-Postip nipitittagaq unammersuaarnissamut iluaqutaasussaq ataasinngormat saqqummiuppaa.

Nipitittakkap tunineranut sinneqartoorutaasoq Arctic Winter Games 2016-imut tunniunneqassaaq. Nipitittagaq ataaseq koruunimik ataatsimik akeqassaaq.

Nipitittakkap assiliartaata AWG2016-ip ilisarnaataata qulaatungaa, tassa nunat tamalaat AWG-mi ilisarnaataat ilanngunnagu takutippaa. Nipitittakkap ilaata taassuma unammiuaarutinut ilisarnaat immikkut ilersippaa. AWG2016-imut ilisarnaat naqitassanik ilusilersuisartup Karsten Skjoldhøjip suliaraa, kingornalu ilusilersuisartumit Nina Spore Kreutzmannimit aaqqissuunneqarluni.

Ilisarnaammi inuit pingasut ilisarnanngitsuliaallutik tasiortut ataatsimoorlutillu imminnut 'kivitseqatigiittut' assiliartaapput. Inuit taakku qulaanni seqineq Kalaallit Nunaata qaqqaasigut alakkarsimavoq. Inuit qulaanniittoq seqinermut, Sermitsiamut, qaarsumut arsarnernullu ilisarnaataasinnaavoq. Aammattaaq Arctic Winter Gamesimi timersuutinut tamanut timersornermi aalanernut ilisarnaataasinnaavoq.

- Ilisarnaat nutaaliaavoq, aammali Inuit ilisarnaatitoqaannut eqqaanarsinnaalluni, Arctic Winter Gamesimi aaqqissueqataasunut souschefi Arnakkuluk Jo Kleist oqarpoq.

AWG2016-ip nipitittagaa ataani takuneqarsinnaavoq