Aqutsineq
Tele-Postip aaqqissuussaaneq millisippaa
Suliffeqarfiup suliassat ataatsimoortillugit inissippai
Tele-Postip immikkoortortat pingasut atuisunut sullissivik, tunisassianut aammalu inuussutissarsiortunut sullissivik, aammalu oqarasuaateqarnermut attaveqaqatigiinnermik tuniniaanermillu sullissivik ataatsimoortillugit immikkoortumi ataatsimi niuernermik tunngaveqarluni ingerlatsiviusussatut inissippai.
Suliffeqarfik Namminersorlutik Oqartussanit pigineqartoq ilisimatitsivoq.
Niuernermik tunngaveqarluni pisortaq
Tassani niuernermik tunngaveqarluni pisortaassaaq upernaaq manna tunisassianut nittarsaassinermillu pisortatut atorfinittoq Brian Smedemark.
Immikkoortoqarfimmi pisortaq Per Svendsen allakkerinermut tunngasut suli akisussaaffigai.
Sullissineq pitsaanerusoq
Pisortaanerup Kristian Reinert Davidsenip tusagassiuutinut nalunaarummi ilisimatitsissutigaa, suliassat agguataarluarnerisigut siunissami atuisunut sullissinertik nukittorsassagaat.
Tele-Postimi pisortatut atorfik ataaseq aammalu aqutsisutut atorfik ataaseq atorunnaarsinneqarput, sulisullu marluk aamma suliunnaarsinneqarlutik.