ukiumut naatsorsuutit
Tele-Postip 107 millionit koruunit Namminersorlutik Oqartussanut tunniuppai
Sulisunut aningaasartuutit ikinnerusut aamma oqarasuaatit angallattakkatigut internetimiillu isertitat amerlanerulernerisa Tele-Post akileraannginnermi 122,2 millionit koruuninik angusaqartippaa.
- Suliffeqarfiup ukiuni arlaqalersuni aalaakkaasumik pitsaasumillu angusaqartarnera iluarisimaartorujussuuarput. Suliffeqarfik piareersarsimavoq, aammalu attaveqaatit pitsanngorsarneqarnissaannik suliassamut angisuumut piareersimalluni, taamaaliornikkut Kalaallit Nunaanni amerlanerusut pitsaanerusumik attaveqaateqalersinnaaqqullugit. Suliniutit taakku inuiaqatigiit ineriartortinneqarnerannut annertuumik pingaaruteqassaput, siulersuisut siulittaasuat Stine Bosse, tusagassiuutinut nalunaarummi oqarpoq.
Iluanaarutit 82 millionit koruunit
Piginnittuusut - Namminersorlutik Oqartusst - iluanaarutinit 82 millionit koruuninik pissarsinissaat aqutsisut innersuussutigaat, suliffeqarfiullu akileraarutinut akiligassat akilerpagit, piginnittut nunap karsianut 107 millionit koruuninik pissarsissapput.
Ingerlatseqatigiiffiup tusagassiuutinut nalunaarummi erseqqissaatigaa, ''aningaasaqarnikkut pitsaasumik ingerlanerup ilaatigut kingunerisaanik Tele-Postip illoqarfinni immap naqqatigut kabeleqarfiusuni internettimut akit 2016-imi appartissinnaasimavai''. Aammattaaq oqarasuaatinut angallattakkanut atuisuuffik nutaaq unammillerfiusinnaasoq Tusass Plus, siullermeerutaasumik akeqanngitsumik oqaloqatiginnillunilu akeqanngitsumik SMS-inik nassitsisinnaasoq atuutilersissinnaasimallugu.
350 millionit koruuninut aningaasaliissutit
- Tele-Postip anguniagaraa inuiaqatigiinni ataqatigiissumik siuariartortitsinermillu pilersitsinissaq. Tamanna annertuunik pilersaaruteqarfigaarput, aammalu suliniutinik attaveqaateqarnermut tunngasunik annertuunik aningaasalersuinissaq 2017-imi 350 mio. kr.-nik akeqassalluni. Aalaakkaasumik pitsaasumillu aningaasaqarnitsigut aningaasalersuinerit annertuut eqqissisimalluta suliarisinnaavagut, pisortaaneq Kristian Reinert Davidsen oqarpoq.