sipaarniuteqarneq
Tele-Postimi soraarsitsinerit
Nalunaarasuartaaserinermik ingerlatsivimmi pisortanit pigineqartumi sulisut aqqanillit soraarsitaapput
Pisariillisaaneq pissutigalugu Tele-Postimi sulisut aqqanillit soraarsinneqarput, aammalu sulisut 50-it missaat immikkoortortaqarfimmut allamut nuutsinneqarput imaluunniit allamik pisortaarput.
Nalunaarasuartaaserivik tusagassiuutinut nalunaarummi taama paasissutissiivoq.
- Alloriarneq siulleq tassaavoq, nittarsaassinermik nioqqutinillu ineriartortitsinernik suliaqarnerit tamarmik immikkoortortaqarfimmut nutaamut ataatsimoortunngortinneqarnerat, taamaalillutik 'Inuussutissarsiutilinnik' 'Innuttaasunillu' sullissisut sullitanut tuniniaanermik sullissinermillu tamakkiisumik suliaqarsinnaanngussallutik, Tele-Postimi pisortaaneq, Kristian Reinert Davidsen oqarpoq.
Atuaruk: Allakkanik nassiussineq akisunerulertoq
Akit appasinnerusut
Kristian Reinert Davidsenip oqaatigaa, mobiltelefoneqarnermut interneteqarnermullu akit qaffasippallaartut.
- Tamanna iliuuseqarfigisariaqarparput. Tamanna ilutigalugu aningaasaliiffigisassat aningaasassaqartittariaqarpagut, taanna erseqqissaavoq.
Pisariillisaaneq
Nalunaarasuartaateqarnermik ingerlatsiviit nunarsuarmi tamarmi allaffissornikkut annikillisaasut, saassuma paasissutissiissutigaa, Tele-Postilu aamma taamaaliortariaqarnerarlugu.
- Tele-Post siunissami pisariillisaavigiuassavarput, sulisullu pikkorissorpassuit siunissamik pilersitseqataasussat suli atorfissaqartippagut, Kristian Reinert Davidsen naggasiivoq.
Atuaruk: Tele-Post kiisami pisortaanertaassaaq