binzerip soraarnera
Tele-Postimi siulersuisut soraarsinneqarnissaanik oqartoqarnera Demokraatit inuusuttaannit isumaqartigineqarpoq
Siumumit Lars-Emil Johansenimit oqaatigineqartoq Demokraatit Inuusuttaannit isumaqatigineqarpoq
Demokraatit Inuusuttaasa Siumumut tunngassuteqartunut qaqutikkut isumaqataasarput. Siumumi politikkerinut akerlilersuisarput, Siumumulluunniit arlaannik tunngassuteqartumik akerliliisarlutik.
Lars-Emil Johansenip tallimanngornermi oqaatigaa Tele-Postip siulersuisui tamarmik soraarsinneqartariaqartut. Michael Binzerip soraarniuteqarneranut taamatut oqaaseqarpoq. Taama oqarnera Demokraatit Inuusuttaannit isumaqatigineqarpoq.
- Ineriartornermut nutaamillu eqqarsartunik Michael Binzeritut ittunik maannakkut Naalakkersuisoqartilluta inissaqartitsinngillat. Isummanik annitsisoqarsinnaasariaqarpoq. Ineriartornitsinni siumut eqqarsartunik nutaaliorusuttunillu atorfissaqartitsivugut, Demokraatit Inuusuttaata siulittaasuat Randi Vestergaard Evaldsen siulittaasullu tullia Rasmus Dalsgaard Andersen tusagassiutinut nalunaaruteqarput.
- Michael Binzer siunissamut ungasinnerusumut eqqarsartuuvoq anguniagaqartoq, soraarniuteqarneralu nunatsinnut annaasaataavoq annertooq, oqarput.
Atorfinititsisarnerit
Namminersorlutik Oqartussat suliffiutaat toqqissisimasumik sulisariaqartut oqariartuutigaat.
- Politikkikkut attuumassuteqartumik Namminersorlutik Oqartussat suliffeqarfiutaanni atorfinititsisoqartarunnaartariaqarpoq. Kalaallit Nunaat qajannartumik inissisimavoq, taamaattumik Naalakkersuisut pitsaanerusumik sulisariaqarput. Pitsaanerusumik sulisoqalinngippat qinersititsinissamik suaaruteqartoqartariaqarpoq, Demokraatit Inuusuttaannit oqaatigineqarpoq.