nalliuttorsiorneq
Tele-Post ukiunik 90-iliivoq
Godhavn Radio ukiut 90-it matuma siornatigut pisortatigoortumik atoqqaarfissiorneqarpoq Kunngi Christian-imut telegrammerluni, Tele-Postilu taamaasilluni septembarip 6-anni 90-iliilluni nalliuttorsiussaaq
Grønlands Styrelse 1924-mi aalajangerpoq Kalaallit Nunaanni nalunaarasuartaateqarfinnik sisamanik pilersitsiniarluni, Qeqertarsuarmi, Nuummi, Tasiilami Qaqortumilu.
Aappaaguani Godhavn Radio nalunaarasuartaateqarfinnit sisamanit siullersaalluni atorneqalerpoq, Tele-Post tusagassiorfinnut nalunaarummi allappoq.
Tamatumunna atatillugu qallunaat nunap iluani pissutsinut ministeriat C. N. Hauge Qeqertarsualiarsimavoq, 1925-milu septembarip 6-anni taassuma nalunaarasuartaateqarfik pisortatigoortumik atoqqaarfissiorpaa, Kunngimut telegrammerluni imatut oqaasertalimmik:
´Ataqqinartorsuaq Danmarkip Kunngia København
Ullumikkut Godhavnimi nalunaarasuartaateqarfik ammarpara Telegrammi siulleq Kunngimut nassiullugu Qallunaat Kalaallillu ataqqinnittumik inuulluaqqusipput maani suut tamarmik ajunngillat
Hauge nunap iluani pissutsinut ministeri´
Attaveqarnermut aallarniut
Telegrammi nassiunneqarsimavoq umiarsuaq pujortulik S/S Oscar II, Norgemi Bergenimiittoq aqqutigalugu. Telegrammi ullut sisamat qaangiuttut Skagenimit akineqarpoq:
´Qujanaq inuulluaqqutikkigit Danmarkip Kalaallillu Nunaata akornanni Attaveqarfik nutaaq pitsaanerpaamik kissaappara
Christian´
Telegrammit taakkua marluk nunami maani nalunaarasuartaatikkut attaveqarnermut aallarniutaapput. 1925-miilli ukiut taakkua 90-it ingerlaneranni nunami tamarmi illoqarfiit nunaqarfiillu tamarmik nunarsuup sinneranut attaveqalersimapput radiomik, telegramminik, telefaxinik, telefoninik attavilikkanik, TV-mik, mobiltelefoninik internettimillu. Silarsuaq tipaatsunnartoq nutaaq.
Tele-Postip ukiunik 90-iliinini nalliuississavaa tallimanngorpat septembarip 4-aanni sulisuminut kaffillerluni kaagillerlunilu.