tillinniarfigitinneq
Tele-Post tillinniarfigineqarlunilu aserorteriffigineqartoq
Taamaattumik Tele-Post Centeri Kangerlussuarmiittoq sapaatip akunnera sinnera matoqqassaaq
Milan Lund Vraa, Tele-Post Centerini tuniniaanermut pisortaq, ataasinngornerup unnuaani Kangerlussuarmi Tele-Post Centeremi tillinniartoqarsimallunilu aserorterisoqarsimavoq. Pisattat tamaavimmik aserorterneqarsimapput, aningaasanut karsit ammarniarsarineqarsimapput, sunalu tamaat qatserutinik serpartarneqarsimapput.
Kangerlussuarmi Tele-Post Centeri tallimanngorneq ilanngullugu matoqqassaaq, Kangerlussuarmili sulisut sapinngisartik tamaat atorlugu allakkanik poortukkanillu agguaassineq sukkanerpaamik aallartinniarsarissavaat.
- Paasitinneqarnera naapertorlugu unnuaq nalunaaqutaq 00.00-ip 01.00-illu missaanni politiinit nalunaarfigineqarpugut, tassani qatserutinik serpartaasoqarsimanera pissutaalluni, taamaaliortoqareersorlu kalerrisaarut aallartissimalluni. Qanoq annertutigisumik tillittoqarsimanersoq qanorlu aserorterisoqartigisimanersoq misissuleruttorparput. Tillinniaq tillinnialluunniit aningaasanik tillinniarniarlutik Tele-Postimukarsimagunarput, Milan Lund Vraa Sermitsiaq.AG-mut oqarpoq.
Tele-Postip pisiniarfittaa allaffittaalu torersarneqangaatsiartariaqartut oqaatigineqarpoq qatserinermut seqqartaatip atorneqangaatsiarnera pissutaalluni.
- Taama pisoqarnera soorunami ajuusaarutigaarput, sullitatsinnummi eqquisussaavoq. Sullitatsinnut sullisseqqilernissarput anguniarlugu sukkasuumik torersaassaagut, Milan Lund Vraa oqarpoq.