Tele-Post sulisunik 15-nik soraarsitsivoq

Sulisut 15-it soraarnissaannut Tele-Postip isumaqatigiissusiorfigai. Pisariillisaasoqarnera pissutigalugu soraarsitsiortortoqarpoq. Tele-Post aningaasartuutikillisarniarpoq akinillu apparsaaneq sulissutigeqqinniarlugu.

Tele Postimi sulisut sisamanngornermi katersortinneqarput tassanilu pisortaaneq Michael Binzer soraarsitsiortornissamik suleriusiulersussamillu nassuiaavoq Tele-Postimi siulersuisunit pisortanillu suliarineqarsimasumik.

Sullitanut pitsaanerusoq
- TELE-POST tassaassaaq atuisutta pisiniarfigissallugu nuannarisaat, pisiniarfitta ilaannut saaffiginnikkunik, internetikkoorlugu nittartakkatsinnut alakkaagunik sianerunilluunniit. Taamatuttaaq nioqqutigut atuisutta pisariaqartitaannut naleqqussarumavagut akillu appartittarnerat ingerlatiinnarlugu ingerlatsinitta pitsanngortikkiartornerata saniatigut, Michael Binzer oqarpoq.

Suliaqarfiit amerlanerit immikkoortuni ikinnerni
Suleriusiulersussaq pillugu ingerlatat suleqatigiiaanut ikinnerusunut katersorneqarniarput. Aaqqissuussaanermi nutaami immikkoortut tassaalissapput ’Innuttaasunut Kiffartuussivik’, ’Inuussutissarsiutilinnut Kiffartuussivik’, ’Siammarterineq’ aammalu ’Teknik aamma IT’.

Sulisut 15-it suliunnaarnissamut isumaqatigiissusiorfigineqarput.

- Soraarnermut isumaqatigiissutit naapertuuttut sulisunut pineqartunut isumaqatigiissutigineqarput, Michael Binzer nalunaarpoq.