internet
Tele-Post: Nanoq Media sillimaqquneqarsimavoq
Imaatigut kabelimik pilersitsiniarnermi Nanoq Mediap Tele-Posti imminut atuisuminillu illersuisuunerarlugu unnerluutiginninnera, Tele-Postip ilumuunnginnerarpaa.
Nanoq Mediami siulersuisuini siulittaasoq Peter Frederik Lyberth, AG aviisimi ilaatigut ima oqarpoq:
- Matoqqagallartitaanerput paasisinnaanngilarput Telep attaviit akornuteqanngitsumik ingerlaannarsinnaappata.
Taamaammat Tele-Post imaatigut kabelimik suliaqarnerup kingunerisaanik sooq Tele-Postimi internetimik atuisut pinnatik Nanoq Mediamilu atuisut kisimik eqqugaasimanerat nassuiaateqarfigaat.
- Nanoq Mediap internetimik kiffartuussisuunermini aaqqiineq teknikkimut tunngasut pissutigalugit Kalaallit Nunaanni internetimut
attavilerneqarsinnaanngitsoq atussallugu namminq toqqarpaa. Tassa taarsiullugu Danmark aqqutigalugu internetimut attaviligaapput. Siunertamut tamatumunnga Nanoq Mediap attaveqaateqarneq immikkut ittoq, tassa Islandip tungaanut imaatigut kabelimik taamaallaat atuisoq, atorpaa. Attavik taanna Canadamut imaatigut kabelikkoortunngorlugu
allanngortinneqarsinnaanngilaq, Tele-Post tusagassiuutinut nalunaarummi allappoq.
Allat eqqugaanngitsut
- Internetimik nioqqutillit allat eqqarsaatigalugit, soorlu Comby, Inu:it, GTV aamma Tele-Post-imut namminermut, internetimut attaviliisoqartarpoq Tele-Post-ip Kalaallit Nunaanni tamanut atuuttumik attaviliineratigut, tassalu Islandimut imaatigut kabelikkut aammalu Canadamut imaatigut kabelikkut attaveqartitsisutigut, tele nassuiaavoq.
Aamma atuaruk: Tele-Post equngasumik unammillertuunerarpaat
- Nanoq Mediap attavia immikkut ittoq 2016-imi pilersinneqarmat, taamani Tele-Post-ip malugeqquaa attaviup taamatut ittup kingunerisinnaagaa, kabelimik suliaqartoqalissappat sivisunerusumik attaveeruttoqarsinnaasarnissaa, Tele-Post allappoq.