internetsimut akit

Tele-Post maanna suli annerusumik internetertitsinnaanngorpoq

Junip allaqqaataani Tele-Postip internetimut akit appassavai paasissutissanullu (data-mut) atukkat annertussusaat qaffallugu

Tele-Postip aasaq aallarnissavaa nunap annersaani internetimik atuisuuffiit pitsanngorsarlugit. Tassalu atuisut illoqarfinniittut imaatigut kabelikkut attavillit akikinnerusumik annerusumilli internetersinnaalissapput, atuisullu illoqarfinni nunaqarfinnilu sakkortusaavikkoorlugu attavillit akit taakkuuginnartillugit annerusumik internetersinnaalissapput, sumiiffinnilu qaammataasakkut attavilinni akit allanngussanngillat.

Illoqarfinni sakkortusaavikkut attavilinni atuisuuffiusimasut Gold aamma Premium assersuutigalugu Internet Akullermik aamma Internet Angisuumik taarserneqassapput, tamatumalu kingunerissavaa atuisut akit allanngortinnagit maannakkut 15 GB-inik aamma 30 GB-inik pissarsisinnaanngornissaat – paasissutissanut atorneqarsinnaasup annertussusaa 60 procent angullugit qaffalluni.

Ilulissani, Aasianni, Sisimiuni aamma Paamiuni atuisut nuannersumik tusagassaqarput, nioqqummi nutaaq Internet Anneq Tele-Postip nioqqutigilerpaa, atuisunut paasissutissanut atuisinnaaneq 50 GB-i 1.149 koruuninik akilik qulakkeerinnissutigalugu.

Nuummi aamma Qaqortumi atuisuuffinni arlalinni akit appartinneqarput. Assersuutigalugu Flatrate-mik atuisuuffik, Flatrate 4, maanna 150 GB-inik imaqqortussuseqalerpoq, akialu 200 koruuninik appaavigineqarluni qaammammut 1.299 koruuninngorlutik.

Tele-Post tusagassiutinut nalunaaruteqarpoq.

Illoqarfinni akit assigiinngitsut
Tele-Postip interneti illoqarfinni imaatigut kabelikkut, sakkortusaavikkut aammalu qaammataasakkut attavilinni assigiinngitsunik akeqartittariaqarpaa, internetimmi atugaanerani aningaasartuutit assigiinngeqimmata. Tamatumunnga pissutaasoq tassaavoq malittarisassiortoqarsimammat sinaakkusiortoqarlunilu nuna tamakkerlugu internetimut akinik assigiissunik atugassaqartitsisinnaaneq Tele-Postimut ajornarsisillugu. Sinaakkutit nutaat siunertaraat internetimut tunngatillugu unammilleqatigiissinnaanerup
nukittorsarneqarnissaa.

Tele-Postimi Innuttaasunut kiffartuussivimmi pisortaq Per Svendsen nassuiaavoq:

- Nuusseqqusaanngilagut – tassa suliaqarfimmi ataatsimi aningaasartuutit, soorlu qaammataasamut tunngasuniit imaatigut kabelimi suliaqarfimmut. Aamma sullitaqarsimagutta amerlasuunik internet akikinnerusunngorlugu taakkununnga nioqqutigisinnaanngilarput. Taamaammat akit sumiiffimmiit sumiiffimmut assigiinngisitaarput. Annertussutsilli qaffassinnaanera akillu taamak
appartitsigisinnaanerat assut naammagisimaarparput.

Assigiinngissutsit ersersinniarlugit assersuutigisinnaavarput illoqarfinni imaatigut kabelikkut attavilinni 15 GB data-mut Internet Akulleq qaammammut 449 koruuneqarpoq, illoqarfinni sakkortusaavikkut attavilinni 15 GB data qaammammut 599 koruuneqarpoq aammalu illoqarfinni qaammataasakkoorlugu attavilinni 9 GB-it qaammammut 599 koruuneqarlutik.

Junip aallaqqaataaniit atuisut tamarmik atuisuuffinnut nutaanut nammineertumik nuunneqassapput.

Powered by Labrador CMS