atugarliortut
Tele-Post Kofoeds Skolemut tunissuteqarpoq
Arctic Winter Gamesimi it-nut atortut sinneruttut maanna Nuummi atugarliortut ornittagaannut tunniunneqarput
Nuummi inuiaqatigiinni ajornartorsiortut Kofoeds Skolemi naakkittarfigineqartarput.
Tassani angerlarsimaffeqanngitsut, suliffissaaleqisut allallut pikkorissarsinnaapput, nerisassiorsinnaallutik assassorsinnaallutillu.
Timersornermik aaqqissuussami atorneqartut
Suliniut tamanna Tele-Postimit assut iluaqutaassangatinneqarpoq, taamaamallu qarasaasianik mobiltelefoninillu qulinik Kofoeds Skolemut tunissuteqarnissaq aalajangiunneqarpoq.
Taakku atortut digitaliusut taamaallaat marsimi 2016-imi Arctic Winter Gameseqarnerani atorneqarsimapput.
Qarasaasiat mobiltelefonillu ilaatigut Kofoeds Skolep ingerlanneqarneranut atorneqassapput, kisianni qarasaasiat inini ilinniartitsiffiusartussani pingaartumik atorluarneqassapput.
Suliffissarsiortassasut
- Nunatsinni innuttaasut allat assigalugit inuit maanga takkuttartut atortorissaarutinik digitaliusunik atuisinnaanngornissaat kissaatigaara, Kofoeds Skolemi pilersaarusiornermut aqutsisoq Gudmundur 'Gujo' Thorsteinsson oqaluttuarpoq.
- Qarasaasiat ilaatigut suliffissarsiornerminnut ilinniartinneqarnerminnulluunniit atortassavaat, tunissuteqarfigineqarnerpullu qujamasuutigeqaara.
Assit takukkit: Nuummi innuttaasunut atugarliortunut neqeroorut nutaaq