Tele-Post
Tele-Post isornartorsiorneqaqqippoq
Attaveqaatitigut unammilleqatigiittoqalernissaa Tele-Postip pinngitsoortinniaraa politikkerinit unammillertaasuniillu isornartorsiorneqarpoq
Kalaallit Nunaanni internetsimi unammilleqatigiittoqassanngikkallarpoq aamma internetsi akikillineqassanngikkallarpoq. Attaveqaatinik atuinermi namminersortunngorsaanissamut periarfissanik misissuinerup Tele-Postimit unitsinneqarsimanera nalunaarutigineqarpoq. Misissuisitsineq akisuallaartoq Tele-Postimit oqariartuutigineqarpoq.
Utoqqatsissut pitsaanngitsoq
Misissuinerup unitsinneqarneranut misissuisut akisuallaarnerarlugit Tele-Postip pisuutitsinera Inuit Ataqatigiinnit Naaja Nathanielsenip Twitterikkut allalluni isornartorsiorpaa. 'Utoqqatsissut pitsaanngilaq', illuatungiliuttunit politikkeri ilaatigut allappoq.
Attaveqaqatigiinnerup namminersortunngorsarneqarnissaanik unititsigallarneq naalakkersuisuusimasup Steen Lyngep, Atassummeersup, aamma isornartorsiorpaa.
Unammilleqatigiittoqarnissaa neriuutaagaluartoq
Tele-Postimut unammillertaasumut Comby-mut pisortaasup Brian Torpip aamma Tele-Postip aalajangiinera Radioaviisikkut isornartorsiorpaa.
- Tele-Post eqiinganerusariaqarpoq taavalu isumaqatigiissutinut inatsisinullu ataqqinninnerusariaqarluni tuniniagassanilu isumaqatigiissutigineqareersutut tuniniarlugit, Brian Torp KNR-imut oqarpoq.
Tele suli oqaaseqanngilaq
Namminersorlutik Oqartussat suliffeqarfiutaani, Tele-Postimi, pisortaanerugallartoq Steen Montgomery-Andersen, siulersuisunik ataatsimeeqateqarnini ullumi pingasunngornermi pissutigalugu suli oqaaseqarsinnaanngikkallarpoq. Tele-Postip politikkerinit unammillertaaniillu isornartorsiorneqarnera Sermitsiaq.AG-mit oqaaseqartinneqassaaq.