internet
Tele-Post: Interneti sukkanerulissaaq
Interneti sukkanerulertussaavoq, Tele-Post taama ilisimatitsivoq.
Tamatuma piareersarneqarnerata ilaatut internetimut nioqqutit nutaat atulernissaannut atortulersuutit atorneqartussat saqqummiussinissap tungaanut Tele-Postimit misilerarneqaqqaassapput.
- Tamatuma kingunerissavaa, Nuummi aammalu Qaqortumi Tele-Postip nioqqutaanik internet 'Anneq' 10/2 Mbps-imik atuisorpassuit piffissap ilaani sukkassutsinik sukkanernik atugaqarnissaat. Misileraanerit naammassineqareeriarpata nalinginnaasumut tamanna uteqqissaaq.
Ingerlatseqatigiiffik Namminersorlutik Oqartussanit pigineqartoq nittartakkamini taama allaaserisaqarpoq.
Illoqarfinni ukunani Tele-Post internetimi nioqqutinik nutaanik saqqummiussissaaq: Nanortalik, Narsaq, Qaqortoq, Paamiut, Nuuk, Maniitsoq, Sisimiut, Kangerlussuaq, Kangaatsiaq, Aasiaat, Qeqertarsuaq, Qasigiannguit, Ilulissat aamma Uummannaq.
Tassanilu atuisut ilaatigut sukkanerusumik internetersinnaalissapput.
- Tamanna uatsinnut sullitatsinnullu assorsuaq pissanganartuuvoq. Nioqqutit nutaat imaat akiilu decemberimi saqqummiunnissaat qilanaareqaarput. Digitalinik ineriartortitsinerup peqataaffiginera juullertinnagulu sullitatta nutaarluinnarnik periarfissilernerat Tele-Postimi akisussaafferujussuarmik tigusaqarfigaarput, pisortaaneq Kristian Reinert Davidsen oqarpoq.