atuisunik kiffartuussineq
Tele-Post: Ammanikinnerulerneq atuisut pitsaanerusumik misigisaqartinnissaannik qulakkeerinnissaaq
Oqarasuaatikkut saaffiginnittarfiit nalunaqquttap akunnerini marlunnik ammasarneri sivikillinerisigut, atuisut pitsaanerpaamik misigisaqarnissaat qulakkeerneqarsinnaasoq, Tele-Posti isumaqarpoq.
Namminersorlutik Oqartussat piginneqataaffigisaata tallimanngormat tusagassiuutinut nalunaarutaanni tamanna erserpoq.
Atuisunut sullisseriaaseq nutaaliaanerusoq
Atuisunut sullissivik, oqarasuaatikkut saaffiginnittunut ammasarfii allanngortinneqassapput, ulloq 14. juuni 2017 aallarnerfigalugu. Ammasarfiit nutaat tassaalissapput ataasinngornermiit tallimanngornermut, nal. 10:00-miit 18:00-imut. Ullumikkut atuisut nal 8.00-miit 18.00 tungaanut saaffiginnissuteqarsinnaapput.
- Allannguineq TELE-POSTip atuisut pitsaasumik misigisaqartinnissaannik qulakkeerinninnissamik sulineranut ilaavoq. Oqarasuaatikkut saaffiginnittunut ammasarfiit allanngortinnerinut siunertarineqartoq tassaavoq atuisut sullinneqarnerisa naapertuunnerusunngortinneqarnissaat aamma sunniuteqarnerulersinneqarnissaat, tusagassiuutinut nalunaarummi allassimasoqarpoq.
Tele-Postimi Kommunikationsdirektørip, Arnakkuluk Jo Kleistip pitsanngorsaaneq ima nassuiaateqarfigaa:
Nassuiaat
- Oqarasuaatikkut saaffiginnittarfiit sivikillinerisigut atuisut pitsaanerpaamik misigisaqarnissaat anguniangaavoq. Ullaap tungaanimi atuisut mailerutigisimasaat akineqartalissapput, aammalu tulleriissarilluni sianeqattaartalissalluta kiisalu sulisutta piginnaasaat ineriartortissallutigit. Taakku pingasut taakkartukkakka unammillernartoqartissimavagut, taamaasillutalu atuisut pitsaanerpaamik misigisaqarnissaannut pingaarutilerujussuulluni.