Tele-Post
Tele-Post: Akigitinneqartut appariartuinnassapput
Tamanna Tele-Postip siulersuisuisa siulittaasuanit Agner N. Markimit pisortaanerullu Michael Binzerip neriorsuutigaat
- Tele-Postip akigitinneqartut apparsarneqarnerat aamma attaveqaateqarfinni aningaasalersuineq ingerlatiinnarpai.
Tele-Postip siulersuisuisa siulittaasua Agner N. Mark pisortaanerlu Michael Binzer suliffeqarfiup ataatsimeersuareernerani oqarput.
Naatsorsuutitigut angusat akileraaruteqannginnermi 2013-imi 94,3 million koruuninik annertussuseqarput, piginnittunullu agguagarsiat 47 million koruuniullutik.
Tele-Postip kaaviiaartitsinini attatiinnarpaa naak akigitinneqartut appartinneqaraluartut aamma 2013-imi amerlasuunik aningaasaliissuteqarnerup kingunerisaanik nalikilliliinerit annertusissagaluartut aamma isertitat ikinnerulerlutik, siulersuisut siulittaasuat Agner N. Mark nassuiaavoq, siulersuisuni ilaasortaq Søren Voigt peqatigalugu siulersuisuniiginnartoq oqarpoq.
Nutarterisoqartariaqartoq
Tele-Postip 2013-imi akigititani appartippai aamma attaveqaateqarfinni aningaasaliissuteqarpoq internetimik atuineq annertusiartortoq malinnaaffiginiarlugu. ADSL-imut atortut nutaat ataatsimoortut pisisartut internetimik atuinerat akisunerunngikkaluartumik annertusitippaa, 2013-imilu ADSL-imik atuineq 161 procentimik annertuseriarpoq 2012-imut sanilliussilluni.
- Internetimik atuinerup annertuumik annertusinerata pisariaqartippaa netværkinik annertusaaneq aamma allanngortiterineq, tassa sullittakkat internetimik annertunerujartuinnartumik atuinerat aamma sukkassutsimut naatsorsuutigisaat malinnaatitsiviginiarlugit, Agner N. Mark nassuiaavoq.
Immakkut kabelimik atuinermut akigitinneqartoq marsimi 47 procentimik appartinneqarpoq aasarulu suliffeqarfiup saqqummiutissavai ADSL-imik aamma MPLS-imik atuinermut akigitinneqartut appasinnerusut.
Nunatsinnut pingaaruteqartoq
Maajimi mobiltelefoniimi, sms aamma mobilt internetimi akigititani annertuumik appariartippai.
Unamminartut arlaqartut pissanganartut siunitsinniipput tamakkulu Kalaallit Nunaannut annertuumik pingaaruteqarput. Tele-Postip nuna tamaat suli pilersortussaavaa, taamaattumillu nuna tamakkerlugu inuaqatigiit ineriartornerannut tapersersuisussaalluni, siulersuisuni siulittaasoq oqarpoq.
Ukioq 2013 suliffeqarfimmut pitsaassuuvoq, naatsorsuutitigut angusat akileraaruteqannginnermi 2013 annertussuseqarput 94,3 million koruunit, piginnittunullu agguagarsiat 47 million koruuniullutik.