interneti

Tele: Namminersortunngorsaanermi akit piareerput

2015-imi augustip aallaqqaataaniit niuerfimmi ingerlatsisut allat, Tele-Postiminngaanniit nioqqutinik annertuukkuutaarlugit nioqqutigineqartunik tunisaqaqqittarnernillu pisisinnaanngussapput

Maanna internetsimik niuernermik ingerlatsisut allat, Tele-Postiminngaanniit nioqqutinik annertuukkuutaarlugit nioqqutigineqartunik tunisaqaqqittarnernillu aggustip aallaqqaataaniit 2015-imi pisisinnaanngussapput, Tele-Post taama tusagassiuutinut nalunaaruteqarpoq.

Paasissutissanut internetimilu kiffartuussissutinut namminersortunngorsarneqarsimasunut aningaasartuutaasussat Tele-Postip annertoqisumik misissuiffigai. Tamanna tunngavigalugu nioqqutinut annertuukkuutaarlugit nioqqutigineqartunut aammalu tuneqqinneqarsinnaasutut taagorneqartunut akit maanna naatsorsorneqarsimalerput.

Annertuukkuutaarlugit nioqqutit tassaapput, Tele-Postip attaveqaataani atortut katitertakkat nalunaarasuartaateqarnermik sullissisut paasissutissanik internetimullu kiffartuussissutigisaminnik sanaffigisinnaasaat. Nioqqutit tuneqqinneqartartut tassaapput kiffartuussissutit pioreersut sullissisunit allanit tuneqqinneqarsinnaasut.

Nioqqutit annertuukkuutaartut sullissisut allat nioqqutiminnik annertusaasinnaanerannik, aammalu internetimut paasissutissanullu nioqqutinik qanorluunniit isikkulinnik tamanik tunisaqaqqittarnernik periarfissaqalersissavaat.

- Nalunaarasuartaateqarnermik niuerfimmut allat isersinnaalernissaannut ikiuunnissatsinnut maanna piareerpugut. Unammilleqatigiilernissaq qilanaaraara nioqqutillu allaanerit suut nioqqutigineqalernissaat pissangagalugu, Tele-Postimi pisortaanerugallartoq Søren Lennert Mortensen taama oqarpoq.

Powered by Labrador CMS