Teknikkikkut atortorussaarutit meeqqat atuarfiini atorneqarnerulissapput

Inerisaavimmiit, Ilinniartitaanermut Aqutsisoqarfimmit, Ilinniartitaanermut Naalakkersuisoqarfimmit, Digitaliseeriinermut Aqutsoqarfimmit aammalu kommunimiit, kiisalu atuarfinnit assigiinngitsunit qaammatip aallartilaarnerani Sisimiuni Educational Strategic Planning-eqarnerani ’Digital didaktik’ qulequtaqarluni ingerlanneqarpoq.

Workshopertitsinermik siunertaavoq, atuartitsinermi teknologi atorlugu ilinniartitsinermik ukkataqalersitsinissaq, aammalu meeqqat atuarfiini digitalinngorsaanermut tunngatillugu suleqatigiinnerunissaq pingaartutut isigineqarluni, Qeqqata Kommunia tusagassiuutinut nalunaarummini allappoq.

Ineriartupallanneq

Apple Danmark meeqqat atuarfiani digitalinngorsaanermi, aqutsisoqarnikkut unammillernarsinnaasut pillugit suliniummut oqallisaarummik, oqallittartoqatigiinnik avitseqatigiittarnissamullu oqilisaasuuvoq. Kommunini Atuarfimmi ilinniartitsisut, iPadinut ilitsersuisut, atuarfinni siunnersortit atuarfiullu pisortai peqataapput, maannakkullu teknologiimik atuinermi aammalu digitalikkut periarfissanik atorluaanissamik ineriartortitsinissamullu suleqatigiilerput.

- Kalaallit Nunaanni digitalimik atuineq ukiuni makkunani ineriartupiloorpoq, pisariaqarporlu ingerlatsisut tamarmik ataatsimut anguniagaq tunaartaralugu suliniassasut. Tamanna pillugu workshopertitsineq pingaaruteqarpoq, tassa atuarfinni ilinniartitsisunut aalajangiisartuniit sinniisuutitaq peqataammat, aammalu atuarfiit teknologimik atuinerat eqqarsaatigalugu periarfissat unammillernartullu nassatarisussaagaa ataatsimut paasineqarmata, kommuneqarfik allappoq.

Meeqqat atuarfiat digitaliusoq piviusunngortinneqassaaq

Digitalinngorsaalluni suliaqarnermi killiffik pillugu atuarfiit saqqummiipput, tassanilu piffissami aggersumi meeqqat atuarfiat digitaliusup pilersinnissaanut qanoq iliuuseqarsinnaanermik tikkuaallutik.

Inerisaavik ilinniartitsungorniarneq pillugu nutaamik isummersornissamut isumassarsiaasinnaasunik Inerisaavik saqqummiivoq, Ilinnartitaanermut Aqutsisoqarfik meeqqat atuarfiini digitalinngortitsinissamut periusissiaannik piviusunngortitsinissamut missingiummik saqqummiivoq, atuartitsinermilu iPadsip atuutilersinneqarnissaanut ataatsimut suliniutissanut siunnersuummmik kommunit saqqummiillutik.

- Inerisaavimmut, Ilinniartitaanermut Aqutsisoqarfimmut aammalu kommunit allaffeqarfiineersunut isummersuuterpassuarnik pitsaasunik immersuipput. Inerisaavimmut siunnersuutit pitsasut pappilissamut qorsummut allanneqarput, Ilinniartitaanermut Aqutsisoqarfimmut pappiliaq aappaluttumut, kommuninullu pappilissamut sungaartumut, kommuneqarfik allappoq.

Meeqqat atuarfiat digitaliusoq piviusunngortinneqassappat, siunnersuutit pitsaasut oqartussaasunit pingasuusunit tigulluarneqartariaqarput.