attaveqaatit
Teknikerit Attumut silap peqqutigisaanik anngussinnaanngillat
Nunaqarfimmi Attumi Kangaatsiap eqqaaniittumi attaveqaatit suli ajornartorsiutigineqarput. Teknikerit marluk Attumukarnissaminnut piareersimagaluarput, silali pissutigalugu aallarnissaraluat taamaatiinnarneqarpoq
Kangaatsiap eqqaani nunaqarfimmi Attumi attaveqaatit ima kipisaqattaartigaat nunaqarfimmiunit piffissap ilaani telefonit, interneti atorneqarsinnaanani, soorlu aamma radiukkut tusarnaarsinnaanatillu tv-kkullu isiginnaarsinnaanngillat marlunngormat.
Teknikerit marluk Tele-Postimi atorfeqartut Attumukarnissaminnut piareersimagaluarput pingasunngormat.
Silali pissutigalugu aallarnissaraluat taamaatiinnarneqarpoq.
- Tele-Postimi teknikerit Attumut aatsaat ataasinngorpat marlunngorpalluunniit sila aaqqiimilerpat apuussinnaassapput, Tele-Post tusagassiutinut nalunaaruteqarpoq.
Kim Zinck, teknikikkut ingerlatsinermik Telemi aqutsisuusup oqarnera naapertorlugu, maannakkut attaveqaatit kipisaqattaarnerat, aamma sapaatit akunneranni kingullermi sakkortusaaviup attaveerunnera ilaatigut Attumi sullittakkanik eqquisoq, imminnut attuumassuteqanngillat.