Wednesday, September 6, 2017 - 13:35

Tekle Ghebrelul: Ammip qalipaataanik immikkoortitaaneq ima misigineqartartpoq

Assi.: Nukappiaaluk Hansen
Nunanut allanut unammisartunut sungiusaasuusimasoq Tekle Ghebrelul nunatsinni isikkamik arsaalluni pissartanngorniunnerni arlalinni ammip qalipaataanik immikkoortitaalluni misigisarsimavaa. Taassuma Kalaallit Nunaani Isikkamik Arsaattartut Kattuffiata ajornartorsiummut iliuuseqarumanngissusia qatsulluinnarpaa.

Angutit isikkamik arsaaallutik nunanut allanut unammisartunut sungiusaasuusimasup Tekle Ghebrelulip ukiuni kingullerni pisarsimasut saqqummiutissallugit aalajangerpoq.

Sermitsiaq.AG-p Tekle Ghebrelulip oqaloqatigisimavaa, taannalu isumaqarpoq Kalaallit Nunaanni Arsaattartut Kattuffia ammip qalipaataanik immikkoortitsinernut soqutigisaqanngippallaarsimasoq.

- Ammip qalipaataanik immikkoortitsineq siullermik 2011-imi Aasianni U18-nit pissartanngorniunneranni misigaara. Unammisartuutikka pingasut ilanngullugit nillivigineqarpugut, "Kalaallit Nunaat qimattariaqaripput", afrikamilu orpippassuarni inuusariaqartunga, taanna oqaluttuarpoq.

- Semifinalerpugut, taamatullu pisoqarnerata nalaani isiginnaartunit unammisatsinniillu nillivigineqarnerput akuerisinnaannginnakku unammineq unitsippara, Tekle Grebrelul oqarpoq.

Ajorsarnissaat siorasaarutigineqartoq

Taamani dommeriusoq iliuuseqaqqullugu saaffigisimavaa.

- Ajoraluartumik susoqanngilaq. Pissutsillu aatsaat iluarsineqarpata aatsaat unammeqqissalluta, piumasaraara. Tamatuma kinguneraa unammiumanngikkutta unamminermi ajorsartinneqassasugut pissartanngorniunnermi aqutsisup Tittus Dalagerip siorasaarpaanga, Tekle Ghebrelul oqarpoq.

Taassuma oqaatigaa megafoni tigusariaqarlugu isiginnaariallu unammisaallu oqarfigisariaqarlugit inuusuttut eqqarsaatigineqartariaqartut ammillu qalipaataanik immikkoortitsiviginagit arsaannerat ingerlatsissagaat.

- Tassani ajortussarsiortutut isigineqalerpunga, tusagassiuutitigullu KNAK-mut ajortisaarisuunerarlunga, taanna oqarpoq.

2015-imi pisoq

Massakkut KNAK-p siulittaasua, Gert Fleischer, Sermitsiaq.AG-mut paasissutissiisimavoq, Tekle Ghebreluli 2015-imi Sisimiuni futsalimik pissartanngorniuttoqarnerani pissuserisimasaa pillugu mianersoqquneqarsimasoq. Tassanilu aamma Tekle Ghebreluli iluamik pineqarsimanngissorivoq

Tassani B-67-imi unammisartup semifinalernermi aappaluttumik tunineqarsimanera pineqarpoq, kisianni B-67 paasitinneqarsimanngilaq unammisartoq pissartanngorniutivinnermi peqataassanngitsoq, unammisartormi marlunnik sungaartunik tunineqarpoq tamannalu unammeqqusaajunnaarnermik kinguneqartarani.

- Dommeri Michael Jensen oqaloqatigaara, nalunnginnakkumi unammisartut minnerpaamik peqatigiiffinnit pingasuneersut taama anisitaanikuullutik unamminerup tulliani unammisimasut. Taamaammat naammagittaalliorpunga, oqaloqatigiinnitsinnilu paasitippaanga unamminermi aqutsisuuginnassalluni akerliuneralu unammisassatsinnut naammagittaalliuuteqassasunga. Unammisartut anisitaallutik unamminerup tulliani unammeqqissimasut aavakka. Taakku anisitaanikuungaluarlutik unamminerup tulliani unammisimanertik uppernarsarpaat.

- Dommerip aamma pisinnaatitaaffiginngilaa unammisartup unamminermi aallarteqqaartussani peqataannginnissaa, tamanna uanga sungiusaasutut suliassaraara, taanna erseqqissaavoq.

Ajortussarsiortutut isigineqartoq

- Dommeri aperaara sooq maleruaqqusaq tamanut atuutsinneqarani uannuinnaq atuutsinneqassanersoq. 'Nipangerit' nipituumik akissutigineqarpoq. Kingorna paasivarput, unammisartoq anisitaasimasoq pillugu peqatigiiffik naammagittaalliuuteqarsimasoq. Pissartanngorniunnermi ataatsimiititaliat KNAK-mi siulersuisuisa arlallit ilaasortaaffigisaat peqataapput, iliuuseqassanatillu aalajangerpaat unamminerimmi ingerlanneqareersimasut kalluarneqassammata peqatigiiffiillu allat ajungaatinneqassallutik, Tekle Ghebrelul oqaluttuarpoq.

Nangipporlu:

- Pisumut tunngatillugu ajortussarsiortutut isigineqaqqilerpunga, KNAK-lu nuanninngitsumik eqqartorneqaqqilluni. Aamma ukioq manna futsalimik pissartanngorniunnermi Maniitsumi pisumut, aasarmannalu anngunniunnermi Snapchatikkut assineqarninni aammaarlunga sammineqaqqilerpunga. Tassani aamma ajortussarsiortutut isigineqaqqilerpunga, tamannalu naapertuilluannginneruvoq.

Aappaluttuliinermut pisoq ulloq manna tikillugu tupigusuutigaa. Sooq KNAK aalajangersimava unammisartuutaa unammeqqusaassanngitsoq, unammisartullu peqatigiiffinnit allaninngaanneersut aappaluttulingaasimasut unammisinnaasimallutik.

- KNAK-mi ilaasortat unammisartuutima peqataannginnissaa aalajangeeqataaffigaat. Sooq? Uanga unammisartuutigingakku taamaaliortoqarpa?, Tekle Ghebrelul ukiuni kingullerni pisut KNAK-p nassuiaateqarnissaa piumasaralugu aperivoq.

- KNAK-p uannut salluliuutiginninnera tamaanga killittariaqarpoq, taanna oqarpoq.

Ammip qalipaataanik immikkoortitsineq massakkut unitsilli

KNAK-llu ammip qalipaataanik immikkoortitsinerup unitsinniarsarinngitsutut pissuseqanngitsoq Tekle Ghebrelul isumaqarpoq.

- KNAK-p ilisimangaluarpaa ammip qalipaataanik immikkoortitaalluta nilliavigineqartarnernerput, taaamaattoq tusarfiginikuunngisaannarpakka (KNAK aaqq.) Susoqarsimaneranik nalunaarfigisaraluarpakka, qanorlu iliuuseqarsimappat? Iliuuseqarnikuunngillat. Ammip qalipaataanik immikkoortitsisoqassanngitsoq oqaatigineqarnikuunngilaq. Isumaqarluinnarpunga, KNAK killiliisariaqartoq akiornissaanullu sulissuteqarluni, taanna oqarpoq.

Tekle Gebrelulip oqaatigaa, qanoq ammip qalipaataa aallaavigalugu immikkoortitaasarsimalluni arlalinnik assersuutissaqarluni.

- Ammip qalipaataanik immikkoortitsilluni nillianerit isikkamik arsaannermut akueralugu ilaatinneqalersimasutut, misigaara. Sooq KNAK-p naapeqatigisimanngimmanga assut tupigusuutigeqaara, uangami inuttut sumingaanneerneralu pineqarput.

- Aamma apeqquserpara sooq uannut ammip qalipaataanik immikkoortitsisoqarsinnaanersoq uangalu qisuariaateqarsinnaananga. Tamanna naapertuilluarnerua?, Tekle Ghebrelul aperivoq.

Tekle Ghebrelulip soraarsitaanerut allaaserisat uani atuakkit

Seneste nyheder / Nutaarsiassat kingulliit