Sunday, October 29, 2017 - 10:42

Team Tvillingip eqqugassat marluk pissarsiariniarsaraat

Assi.: Team Tvilling
Team Tvillingip Polar Circle Marathon naammassivaat. Ullumi marathonip affaanut arpassapput.

Polar Circle Marathon marlulissanut Peder aamma Steen Mondrupimut qularnaatsumik naammassivoq, taakku angajuat Michael aamma ilaavoq.

Pederimut issiavik immikkut sanaaq atorlugu akunnerit tallimat minutsillu 57 atorlugit apuupput. Peqataasut sinneri assigalugit misigisassartaa tassani pingaartinneqarneruvoq.

- Arpanneq nuannerluinnartoq unammillernartorlu. Arlaannarpulluunniit taama qattunerit amerlatigisut aqqusaarlugit arpannikuugunanngilaq, taakku Facebookimi allapput.

Ullumi marathonip affaanut arpassapput, taamaalillutik katillugu Polar Bear Challengemik taaguutilik peqataaffigissavaat.

- Katillugu ulloq nuannerluinnartoq, nalunngilarput aqagu ullaakkut nal. 07.00 bussinukarutta marathonip affaanut arpannissarput taama artornartigeqqikkumaartoq, taakku allapput.

Ataani videomi Team Tvillingikkut apuunnerat takuneqarsinnaavoq.

Seneste nyheder / Nutaarsiassat kingulliit