Arctic Winter Games

Team Nunavik Kangerlussuarmi rockerput

Ulluni arlalinni kinguaattoorsimallutik Team Nunavik Quebecimeersut ilaat Kangerlussuarmi utaqqisunut ilanngupput. Tassani Hand Games-erput tumerparpaanik rytmit nipituut atorlugit

Hand Gamesimi suna tigumiaq akeqqanut isertuunniarneqartarpoq

Team Nunavik Quebec holdit allarpassuit assigalugit anorersuarmit nittaalartalimmit kinguaattoortinneqarput. Nuup anorersuarnerata saniatigut aamma Iqaluit Kuujjuarlu anorersuarsimapput, taakkualu Team Nunavik Quebecip Nuummukarnerminni aqqusaartussaasimavaat.

– Kuujjuarmi ulluni sisamani sapernguvugut, Chris Martin oqaluttuarpoq, taanalu Dene-mi unammisartuuvoq.

Qanoq ilioriarfissaqanngilaq

Taassuma kinguaattoornertik tupigivallaanngilaa.

– Pinngortitaq arlaannik aalajangeraangat qanoq ilioriarfissaqarneq ajorpoq, taanna oqarpoq.

Team Nunavik Quebecimeersut tallimanngormat Iqalunnit Nuummut toqqaannartumik timmisartortussaasimagaluarput. Taarsiullugu aallartitat tassuunaqquullutik timmisartorput, sinnerilu, peqataasut 70-it missaanniittut, ullumi Kuujjuarmit Kangerlussuarmut toqqaannartumik timmisartuunneqarput, tassanilu Nuummut timmisartuunneqarnissartik utaqqivaat.

Hand Games

Nunavimmiut tikimmata Kangerlussuup Mittarfiani pisoqarnera allanngorpoq. Taakkua unammissut Hand Games aallartippaat, taanalu Dene Gamesit ilagaat. Peqataasut inersuarmi tikittut utaqqisarfianni imminnut saallutik seeqqumiarput sinnersaraallutillu suna tigumiartik holdip aappaanut isertuunniartarlugu. Pinnguaat tumerparpaanik nipitoorujussuarmik rytmerluni ingiorneqarpoq.

Tallimanngormat Iqalunni ima silarlutsigisimavoq illoqarfimmi pisortat illuutaat arlallit matoqqasimallutik, CBC.ca paasissutissiivoq.

Powered by Labrador CMS