Malunnartitsineq
TB-mik nappaateqartut ikiliartunngillat
Sakialluut TB nunatsinni suli ajornartorsiutaaqaaq, angerlarsimaffeqanngitsut, pingaartumik Nuummi, annertuumik tuniluutsitsisuullutik
Nunarsuarmi peqqinnissamut suliniaqatigiiffiup WHO-p sakialluummut TB-imut ullorititaa malunnartinneqarnissaa ullormik sioqqullugu Namminersorlutik Oqartussat tusagassiuutinut nalunaaruteqarput sakialluut TB nunatsinni suli ajornartorsiutaaqisoq.
- Nappaat suli akiorniarsaraarput. 2014-imi 95-it TB-mik tuniluuttumik nappaateqarnerat paasineqarpoq, Namminersorlutik Oqartussat taama nalunaaruteqarput.
Sakialluutip TB-ip nunatsinni atugaanerata annikilliartorneranut ajoraluartumik takussutissaqarpianngitsoq, Namminersorlutik Oqartussat ilisimatitsipput.
- TB pillugu ajornartorsiutip peqqinnissaqarfimmit kisermaallugu aaqqiivigineqarsinnaannginnerata paasinissaa pingaaruteqarpoq. Ajornartorsiutit angerlarsimaffeqanngitsoqarneratut ittut sivisuumik TB-mut nakorsartinnissamut ajornakusuulersitsisuupput. TB-mik tuniluuttumik nappaatillit angerlarsimaffeqanngitsut illoqarfinni arlalinni - pingaartumillu Nuummi, annertuumik tuniluutsitsisuupput, Namminersorlutik Oqartussat allapput.
Atuaruk: Sakialluut TB pillugu nittartakkamik ammaasoqartoq
Taamaammat iluatitsilluarnissamut aqqut, annertuunik, sivisuunik, ataavartunillu pisortaqarfinnit qitiusunit, peqqinnissaqarfimmit innuttaasunillu namminernit iliuuseqarfigineqarnermik tunngaveqartariaqartoq, Namminersorlutik Oqartussat allapput.
- Nappaat nungutivissagaanni ineqarnikkut atugassarititat pitsanngorsartariaqarput, suliffissaaleqineq annikillisinneqartariaqarpoq pissakinnerillu nalinginnaasutigut pitsaanerusunik atugassinneqartariaqarlutik, Namminersorlutik Oqartussat allapput.
Aqagu marlunngorneq marsip 24-at nunarsuarmi peqqinnissamut suliniaqatigiiffiup WHO-p sakialluummut TB-imut ullorititaraa, tuberkulosep inuiaqatigiinni ulloq taanna nunarsuaq tamakkerlugu sammineqarneranut atorneqartarpoq.