Taxartartoq soraarsinneqarpoq

– Nuuk Taxi A/S-imi ulluinnarni oqartussaasutut pisimasoq ajuusaarutigaara.
Tassami pisortaagallartdoq Erik Jensen Sermitsiaq.AG-mut tusgaassiorfinnut nalunaarummini allappoq.
Taassuma tusagassiorfinnut nalunaaruteqarneranut pissutaavoq Inatsisartunut ilaasortat Nikolaj Jeremiassen aamma Karl-Kristian Kruse sisamanngormat taxa-mut ilaallutik taxa-nik ingerlatsisumit akerartorneqarsimammata, taamanikkut Inatsisartuni amerlanerussuteqartut uranimut akuersaanngilluinnarnerup atorunnaarsinneqarnissaa akuersissutigimmassuk. Aalajangiineq tamanna taxamik ingerlatsisup nuannarisimanngilaa.
– Nikolaj Jeremiassenip Karl-Kristian Kruse-llu taxartartutsinnit tujormisinneqarsimanerat nuanniitsoq akisussaaffigerusupparput. Erseqqisaatigissavara Nuuk Taxi A/S-imi sullissineq pitsaasoq ilaasutsinnut toqqissisimanartoq ataqqinnittumillu pissusilersorfiusoq pingaartitarigatsigu, Erik Jensen allappoq.
Taassuma oqaatigaa taxanik ingerlatsisunut tamanut malittarisassani tunniunneqartartuni malittarisassat ersarissuusut, taxanillu ingerlatsisut akuttunngitsumik malittarisassanik eqqaasinneqartartut.
Aamma atuaruk: Siumukkormiut: Taxartartumit akerartorneqarpugut
Aamma atuaruk: Taxartartoq: Ajuusaaqaanga
– Nuuk Taxi A/S-imi politikkikkut soqutigisanilluunniit allanik attuumassuteqanngitsumik sullississaagut, tamatumalu tamatigut ingerlanneqartarnissaa anguniassavarput. PIsumasukkullu takusinnaavarput pitsaanerusumik sullissiniarluta tamaviaarnerusariaqartugut. Taamaattumik taxa-mik ingerlatsisoq piffissaa aalajangernagu soraarsissimavara. Tassa imaappoq, piffissap ingerlanerani nalilertassavarput qaqugu uagutsinni taxamik ingerlatseqqittalersinnaanersoq, Erik Jensen Sermitsiaq.AG-mut nalunaarummini allappoq.