Tatiginninneq annikippoq

Naalakkersuisut tamangajammik tamarmilluunniit peqquserluttuupput. Inuit tallimaagaangata ataaseq imaluunniit inuiaqatigiit 22 procentii taama isumaqarput.

Inuussutissarsiornermilu aqutsisut pitsaanerungaanngillat. Taakkumi inuiaqatigiit 16 procentiisa peqquserluttutut isigaat.

Tatigineqanngillat

Kisitsit Transparency International Greenlandip misissuineraneersuupput. Taakku inuit immikkut toqqakkat 510-t paasiniaaffigisimavaat.

- Politikkerinut inuussutissarsionermilu aqutsisut tatigineqarneri annikitut maluginiarpara, Transparency International Greenlandimi siulittaasoq Anita Hoffer oqarpoq.

Naalakkersuisut suliniutikippallaarput

Naalakkersuisut peqquserlunneq pinngitsoortinniarlugu suliniuteqanngippallaartut apersorneqartut 63 procentii isumaqarput.

- Imaanngilaq Naalakkersuisut suliniuteqanngiviitut inuiaqatigiilliuku sulianik malinnaatinngeqanngippallaartut, Anita Hoffer nassuiaavoq.

Atuaruk: Naalakkersuisut peqquserlunnermut iliuuseqarnissamut sumiginnaasut

Kammalaatersorneq

Misissuineq Transparency International peqquserlunnermut misissuineranut ilaavoq. Nunat allat assigalugit inuiaqatigiit peqquserlunneq pillugu paasinnittariaasaat aallaavigalugu suliaalluni.

Taamaasilluni nunamit nunamut isumaritinneqartoq assigiinngissinnaalluni. Sulinermi aningaasanik akiliilluni pisoqartarneranit allamilluunniit isumaqartinneqarsinnaalluni.

- Inuiaqatigiit akornanni peqquserlunneq taama qaffasitsigitinneqarnerata takutippaa peqquserlunneq kammalaatersonermut ikinngutinillu sullissinermik isumaqartinneqarsinnaasoq, Anita Hoffer oqarpoq.

Peqquserlunneq akiorniarlugu politikkiliortoqarli

Inuiaqatigiit tatiginninnginnerat Naalakkersuisunit pimoorunneqassasoq Transparencyp kaammattuutigaa. Peqquserlunneq pinngitsoortinniarlugu politikkiliortoqarnissaa, soorlu aatsitassanut naalakkersuisoqarfiup 2015-mi martsimi suliarinikuusaat Namminersorlutik oqartussanut tamarmut atuutsinneqalernissaa kaammattuutigalugu.

Taassumalu saniatigut Kalaallit Nunaata Naalagaafiit Peqatigiit peqquserlunneq ikiorniarlugu isumaqatigiissutaat atuutsilissagaat kaammattuutigalugu.

- Politikkerit isumaqatigiissutillu kisimik aaqqiisinnaanngillat. Suliassaq annertuneruvoq, Anita Hoffer naqissusiivoq.

- Peqquserlunneq akiorniarlugu naalakkersuisoqarfiit sulisuminnik pikkorissartitsisariaqarput.

Paasititsiniaaneq

Inuiaqatigiit tatiginninnginnerisa kingunerannik avammut aamma iliuuseqartoqartariaqartoq erserpoq.

- Inuiaqatigiit eqqasuutaat Naalakkersuisunit pimoorunneqassappata paasititsiniaanerit ingerlanneqartariaqarput arlaatigulluuniit iliuuseqarfigineqartariaqarluni, Transparencymi siulittaasoq oqarpoq.

Misissuinermi Kalallit Nunaat ajornerpaami inissisimanngilaq. Nunami 42-suni peqquserlunnginnerpaatut 11-mi inissisimagami.