ajunaarnersuaq
Tassaarsuarmit eqqugaasut 26-t suli inissarsineqanngillat
Naalakkersuisut siulittaasuat Kim Kielsen aamma Avannaata Kommuniani ikaarsaariarnermut ataatsimiititaliami siulittaasoq Palle Jeremiassen, innuttaasunut juunimi ajunaarnersuarmit eqqugaasunut marlunngornermi paasissutissiillutik ataatsimiititsipput
Apeqquterpassuit qaqinneqarput, kisianni nunaqarfinnut taakkununnga marlunnut utersinnaannginneq Kim Kielsenimit aamma Palle Jerimiassenimit oqaatigineqarpoq.
Nunaqarfiit suli ulorianartorsiorfiusut
- Upalungarsimanissamut Ataatsimiititaliap naliliinera allanngunngilaq: Illorsuit Nuugaatsiarlu suli njussallugit navianartoqartutut isigineqartariaqarput. Taamaammat innuttaasut Nuugaatsiamut Illorsuarnullu uternissaat innersuussutigineqanngilaq. Innersuussut tamanna Naalakkersuisut Qaasuitsullu Kommuniata tusaatissatut tiguaat. Tamanna tunngavigalugu innuttaasut Nuugaatsiarmit Illorsuarniillu qimagussorneqarsimasut ikiorniarlugit sulivugut. Tamanna aamma tunngavigalugu nunaqarfinni sullissiviit assigiinngitsut, soorlu atuarfik, pisiniarfik, innaallagissiorfik, peqqinnissaqarfik il.il. ingerlateqqinneqarsinnaanngillat. Taarsiullugu Namminersorlutik Oqartussat kommunelu innuttaasut eqqugaasimasut ajornartorsiutaannik pisariaqartitaannillu ikiorniarlugit inoqutigiikkaani ataasiakkaani pisariaqartinneqartut aallaavigalugit sulipput, ineqarneq, meeqqat, suliffissat inuunermilu pisariaqartitat allat eqqarsaatigalugit, eqqugaasunut taama oqariartortoqarpoq.
Nuugaatsiami Illorsuarnilu inoqutigiinnit 62-init 13-it inissinneqareersimapput, pingasut namminneq illuminnut isertersimallutik, 17-it INI A/S namminersortumilluunniit attartortitsisartut aqqutigalugit inissarsisimallutik. Inuit pingasut utoqqaat illuanniilersimapput.
Inoqutigiit 26-it suli inisseqqinneqanngillat. Taakkunannga aqqanillit kollegianiikkallarput arfineq marlullu ilaquttani ikinngutiniluunniit inisimallutik.
Inissianik nutaanik sanaartorneq
Innuttaasut pineqartut nutaanik sumilu inissaliuunnissaat Namminersorlutik Oqartussanit Qaasuitsullu Kommunianit pilersaarusiorneqaleruttorpoq. Namminersorlutik Oqartussat kommunellu sanaartornissanut 70 mio. kr.-it illukartereerpaat, danskillu naalakkersuisuisa sanaartornissanut atugassanik aamma 30 mio.kr.-nik qinnuteqarniarlutik aalajangersimallutik.