Saturday, July 29, 2017 - 08:07

Tassaarsuarmit eqqugaasut: Illorsuarnut angerlarusuppugut

Assi.: Jette Andersen
Illorsuarni innuttaasut nunaqarfimminnut uterusullutik atsiornernik katersisimapput Naalakkersuisunut tunniussassaminnik

- Pinngitsaalisamik najukkamit qimangutsitaasimalluni artornarpoq. Naak qaammat sinnerlugu tamaaneereeraluarsimalluta suli toqqissisimananngilaq. Tamaanimi aamma nammineq angerlasimaffeqanngilagut, Illorsuarmiu Pavia Zeeb, Uummannami atuartut najugaqarfigisartagaanni inissinneqarallarsimasoq oqarpoq.

Mumisitaasimasut

- Inuunerput mumisinneqangaatsiarsimavoq.

Qimangussorneqarsimasut sumi najungaqarusunnerlutik immersuitinneqarsimapput. Tassani Pavia Zeebi nulialu nunaqarfimmukarusullutik qinnuteqarsimapput. Inissaqartitsineq aallaavigalugu aappariit Saattunukanngikkuni Ukkusissanukarusupput, taamaattoq Qaasuitsup Kommunianit suli akissuteqarfigineqarsimanatik.

- Illorsuarni nammineerisatsinnik illoqaraluarpugut taannalu uanga nammineq sanasimavara akilereernikuullutigulli aamma pisariaqartitagut tamaasa pingaavut, taanna oqarpoq. 

Taassuma siunissaq takorlooruminaatsippaa, kisiannili utersinnaasuungaluaruni taanna qulanngilluinnarluni Illorsuarnut utissangaluarpoq.

Tamarmik uterusuttut

- Nunaqarfimmiut tarmarmik Illorsuarnut uterusupput. Atsiortitsinernillu katersuisimavugut, taanna naammassingajalerpoq Naalakkersuisunulli tunniunneqassalluni, atsiornernik katersinerput angerlarusunnitsinnik imaqarpoq, Pavia Zeeb oqarpoq.

Qaqqallu nakkaateqqinnissaanut suli aarlerinartoqaraluartoq annertunerusumillu tassaarsuarmik pilersitsisinnaangaluartoq taama kissaateqarput.

- Juunip qaammataani qaqqap nakkaannera annertuumik naqitsineqarpoq sivingasumiilli pivoq, tamatumalu ajunaarnersuaq annertutippaa. Qaqqalu maanna nakkaateriaannaasoq, qaqugu nakkaatissanersoq immikkulluunniit ilisimasallit eqqoriarsinnaanngilaat. Qaqqaq taanna ukiut marluk matuma siorna assileqareersimavoq sulilu pisoqarfiusimanani. Qaqqarluunniimmi nakkaatileraluarmat taanna nakkaassimanngilaq, taanna oqarpoq.

Aarlerinartorsuaq takusinnaanngikkaat

- Aarlerinartorsuaq taanna Illorsuarmi najugaqartuusugut takusinnaanngilarput. Tassaarsuarmi nunaqarfitsinnut annertunersumik eqquinngilaq. Marloriaannarlunimi nipituuliorfiusimavoq. Ataasinnguamilluunniit ajoqusiinngilaq. Nalunngilara immikkut ilisimasallit oqaatigisaat, qaqqaq nakkaateqqissangaluarpat tassaarsuaq annertunerusinnaasoq, kisianni qaqqap aseruaannikoq pineqarpoq taannalli imaanut sisuunginnarniarpasippoq.

Læs også

tamanut ammasumik ataatsimiititsineq
Seneste nyheder / Nutaarsiassat kingulliit