Monday, November 6, 2017 - 08:48

Tassaarsuarmit eqqugaasimasut tunissuteqarfigineqangaatsiaqqittut

Nuugaatsiami Illorsuarnilu innuttaasut ukioq manna qaqqap sisoornerata kingorna tassaarsuarmit eqqugaasut KNI-p tunissuteqarfingai.
Assi.: Arktisk Kommando
Illorsuarni Nuugaatsiamilu innuttaasut junip qaammataani tassaarsuarmit eqqugaasimasut KNI-p tunissuteqarfingai

Nuugaatsiami Illorsuarnilu innuttaasut ukioq manna qaqqap sisoornerata kingorna tassaarsuarmit eqqugaasut KNI-p tunissuteqarfingai.

Nunaqarfinnilu innuttaasut massakkut tunnissuteqarfigineqangaatsiaqqipput. Aningaasallu katillugit 600.000 koruunit ikiorsiissutitut tunissutigineqassasut, KNI tusagassiuutinut nalunnaarummi allappoq.

- Suleqatigisatsinniit aningaasat 205.500 koruunit pissarsiarivagut. KNI nammineq 250.000 koruunit immikkoortippai. Taamaalilluni aningaasat katillugit 455.500 koruunit ikiuiniarnermut pissarsiarineqarput. Aningaasat saniasigut KNI-p suleqatigisaanit tunissutigineqarput qimminut nerukkaatissat, qaleralinnut qassutit, saviit, tujuulussuit, annoraat il.il. katillugit 182.000 koruuninik naleqartut. Taamaalilluni ikiuiniarnermi katersat ataatsimut katillugit 637.500 koruuninik nalillit katersorneqarput, Namminersorlutik Oqartussat suliffeqarfiutaat tusagassiuutinut nalunaarummi allappoq.

- Aasaq Nuugaatsiami pisimasoq amiilaarnaqaaq, nunaqqatigullu sakkortuumik eqqorneqarput, angerlarsimaffitsik inuussutissarsiutiminnilu tunngavigisatik annaagamikkit. Nuannaarutigaaralu eqqorneqarsimasunut annertoqqutaalaarsinnaasunik tunniussassaqalaaratta, allarpassuit assigalugit ikiuiniarnitsigut pissarsiarisimasatsinnik. Ingammik nuannaarutigaara KNI-mi suleqatigut paasinnillutik ikiuukkumasimammata, innuttaasut eqqorneqarsimasut maanna nunagisatik qimallugit inuunerminnik inuussutissarsiutiminnillu naqqaniit ingerlariaqqinnerminni tapertarilaarsinnaasaannik, KNI-p pisortaanera Peter Grønvold Samuelsen, tusagassiuutinut nalunaarummi oqarpoq.

Marlunngornermi 7. november 2017 Uummannami KNI katersaminik agguaassiniarpoq ilaqutariinnut 80-inut (inuit 170 miss. pineqarlutik) Nuugaatsiarmiuusimasut Illorsuarmiuusimasullu.

- Uummannap avataanut nunassissimasut puigorneqanngillat, pisortallu suleqatigalugit taakku sumut nuussimaneri KNI-mit ilisimaneqarpoq, piffissamilu aggersumi attavigineqarumaarput pissaannillu pajunneqarumaarlutik, KNI paasissutissiivoq.

Seneste nyheder / Nutaarsiassat kingulliit