Tassaarsuaq: Ilaqutariit 33-t nutaamik initaartut

Nuugaatsiami Illorsuarmilu innuttaasut ilaat inissamik tunineqarnissamik nalunaarfigineqarput. Innuttaasut Uummannap avataani najugallit piffissami qaninnerusumi nalunaarfigineqassapput.

Arktisk Kommando

WALTER TURNOWSKY

pingasunn 22. agg 2018 08:57

Annonse

Ilaqutariit Nuugaatsiarmiut Illorsuarmiullu nutaamik initaarnissartik qilanaarisinnaavaat.

Ineqarnermut Attaveqaqatigiinnermullu Naalakkersuisoqarfimmi sulisut ulloq 10. augsut Uummannamut tikeraarput. Tassani aalajangiinernut allakkiat ilaqutariinnut tunniunneqarput. Tamanna ilaqutaariit ataasiakkaarlugit naapeqatigalugit pivoq.

Naalakkersuisoq Simon Simonsenip (S) tusagassiuutinut nalunaarutaani taama allassimavoq.

Inoqutigiit inissiamik attartortittakkamik imaluunniit illumik sanaqataaffiusumik neqeroorfigineqarput. 33-t maanna neqeroorummut akuersillutik atsiorsimapput.

Inissianik taartissanik agguaanissamut tunngavissat

• Inissianik taartissanik innuttaasut, tassaarsuaqartoqarnerata nalaani Nuugaatsiami aamma Illorsuarni najugaqartutut inuit nalunaarsorsimaffianni nalunaarsorsimasut kisimik tunineqassapput.
• Inissianik taartissanik innuttaasut, Nuugaatsiap Illorsuillu avataanni nammineerlutik inigineqarsinnaasumik pioreersunik pigisaminnillu inissarsinissamut periarfissaqanngitsut kisimik tunineqassapput.
• Inoqutigiit Nuugaatsiap aamma Illorsuit avataanni namminneerlutik inissiaateqareernikkut inissiamik imminnut pilersorsinnaasut 50.000 koruuninik taarsiiffigineqassapput.
• Tassaarsuup nalaani inoqatigiinnut ataasiusunut inissiamik taartissamik ataatsimik tunniussisoqassaaq.
• Inoqutigiinni inuit amerlassusaat inissiap taartissap tunniunneqartup angissusissaanut aalajangiisuussapput.
• Tassaarsuup nalaani inissiat nammineerluni pigisat inoqutigiinnut B-normunik piginnittunut tunniunneqassapput.
• Attartortuusimasut tunngaviusumik inissianik attartortittakkanik tunineqassapput.
• Inoqutigiit illoqarfimmut annerusumut, soorlu Upernaviup Uummannallu, taakkuluunniit eqqaannittut saniatigut allamut nuunnissamik kissaateqartut inissiamik attartortittakkamik tunineqarsinnaapput. Attartortut maleruagassat atuuttut naapertorlugit ineqarnermut akiliisassapput.

Tamarmillu illumik taartissamik tunineqarsinnaanngillat. Inoqutigiimmi Nuugaatsiami Illorsuarmilu nunaqarfiup avataani inissiaatillit 50.000 koruuninik taarsiivigineqassapput. Inissamik tunisinissamut tunngavissat juunip qaammataani Naalakkersuisut akuersissutigisimasaanni taama allassimavoq. Taakku kingorna aningaasaqarnermut akileraartarnermullu ataatsimiititaliamit akuersissutigineqarput.

Illuuteqarsimasut nutaamik illuutitaarnissaanik neqeroorfigineqarput. Attartortakkanilu najugaqarsimasut nutaamik attartortakkamik neqeroorfigineqarlutik.

Simon Simonsen (S) tusagassiuutinut nalunaarummi erseqqissarpaa, inissiat nutaat sillimmasiineq aallaavigalugu taarsiissutaanngitsut.

- Tamatumanili inunnik ikiuiniarluni suliniuteqarneq pineqarpoq, tamatumani innuttaasut eqqugaasut inuunerminnik ingerlatitseqqinnissaannut ikiorneqarnissaat siunertarineqarluni, taanna allappoq.

Innuttaasut inissiamik attartortittakkamik neqeroorfigineqartut attartortutut allatut piumasaqaatit malillugit inissianik attartortussaapput. Tassalu qularnaveeqqusiisoqartussaavoq ineqarnermullu akiliisoqartartussaalluni, taamatullu attartortitsisarnermut inatsit ataatsimut isigalugu atuutsinneqartussaalluni.

Innuttaasut illumik taartissamik tunineqartut illumik sanaqataaffiusumik Naalakkersuisunit illuliuunneqassapput. Tassalu ukiuni 33-ni erniaqanngitsunik akilersugassaanngitsunillu taarsigassarsititsisoqassaaq.

Inoqutigiit pingasut Naalakkersuisoqarfiup neqeroorutaannut itigartitsipput, taakkunanngalu marluk taarsiissutissanut tunngasuupput, pingajuat inissiamik attartortittakkamik neqeroorfigineqarnerminut itigartitsilluni.

Innuttaasut 18-it, Naalakkersuisoqarfimmit suli oqaloqatigineqanngillat. Taakku ataatsimiisitsisoqarnerani Uummannap avataani najugaqanngikkunik Uummannamiissimanngillat.

inuiagatigiit nunatsinnit