Tassaarsuaq: Avannaata Kommunia Sara Olsvigimut: Toqqaannartumik suleqatigisigut

Avannaata Kommuniani borgmesteri, Palle Jerimiassen (S), isumaginninnermut naalakkersuisup, Sara Olsvigip (IA) oqariartuutigisaanut arlalinnut narrujuummeqqasorujussuuvoq.

Sara Olsvigip Uummannamut tikeraarneranut atatillugu oqariartuutit taakku oqaatigineqarput, aasaq tassaarsuaqarnerata kingorna qimagussortinneqarsimasut tassani oqaloqatigisimavai. Qimagussortinneqartut arlallit ajunaarnersuaq pillugu suli oqaloqateqarnissaminnik pisariaqartitsisut taassuma oqaluttuaraa.

- Innuttaasut ikiorneqarnissaminnik pisariaqartitsisut illoqarfimminni nunaqarfimminnilu kommunerisaminnut saaffiginnissapput, naalakkersuisoqarfillu malitseqartitsissaaq, Sara Olsvig Qanoruumut oqarpoq.

Peqataatinneqanngitsutut misigisut
Kisianni tamakku tusagassiorfinnut oqaatigissanngilluinnarpai, kommunimut toqqaannartumik oqaatigissavai, Palle Jerimiassen (S) taama isumaqarpoq.

- Sooq taamatut tusarnaarsimanini Sara Olsvigip kommuninut pineqartunut toqqaannartumik apuutinngilaa tusagassiutit aqqutiginagit?

Qanoruumi ilanngutassiami Sara Olsvig (IA) kommuninut isornartorsiuinngilaq, taamaallaat innuttaasut kommunimut saaffiginnissinnaanerat aamma kommunip Naalakkersuisut suleqatigalugit ikiuisoqarsinnaasoq nassuiaatigiinnarpaa. Uummannamut tikeraarnermi kommuni peqataatinneqarsimanngitsoq, Palle Jerimiassen (S) isumaqarpoq.

- Sara Olsvigip Uummannialernerani angalaqataanissatsinnut piareersimasimavugut, taamaalillutalu inuit pineqartut oqaloqatigineqarnerini peqataanissamut piareersimasimalluta. Ajuusaarnaartumik angalaqataanissamut tikilluaqqusaanngitsutut misigigatta angalaqataanngitsoorpugut, taanna oqarpoq.

Qineqqusaarneq
Borgmesterillu isornartorsiuinini nangippaa.

- Nalunngikkaluarparput ukioq manna qinersisoqartussaasoq, taamaakkaluartoq Avannaata Kommunianit sakkortuumik kaammattuutigissavarput sulia tamakku ilungersunartut aaqqinniarlugit toqqaannartumik suleqatigiissasugut qineqqusaarutitut atornagit.