Tasiorta ukiortaamit matusussanngorpoq

Tamanna Namminersorlutik Oqartussat siunissami annertunerusunik tapiissuteqartannginnissaannik peqatigiiffik naatsorsuuteqassanngitsoq ilisimatitsissutigineqarmat aalajangiunneqarpoq.

Kinguaassiutimikkut atornerlunneqarsimasunut tapersersuilluni peqatigiiffik ‘Tasiorta’ februar 2007-mili ingerlasimasoq, inersimasunut meeraanerminni kinguaassiuutitigut atornerlunneqarsimanertik pissutigalugu kingunerlutsitsisunut tarnit pissusaanik ilisimasalinnit ingerlanneqartunik siunnersorneqarnissamik katsorsaanissamillu neqerooruteqartartoq, 31. januar 2015 matusussanngorpoq.

Taama peqatigiiffik nalunaaruteqarpoq.

Nunali tamakkerlugu oqarasuaatikkut normu 141 atorlugu siunnersuisarneq 28. februar 2015-ip tungaanut ingerlagallassaaq.

- Tusagassiuutinut matunissamik nalunaaruteqartariaqalerneq Tasiortap siulersuisuinit annertuumik ajuusaarutigineqarpoq, matusariaqalernerummi inersimasut amerlasuut meeraanerminni inuusuttunngulernerminnilu kinguaassiuutitigut atornerlunneqarsimanerminnik kingunerlutsitsisut eqqussammagit aammalumi taakku ilaqutaat peqatigiiffiup iliuuserisartagaanik iluaquteqarsimasut, Tasiortap siulittaasua Kisea Bruun taama allappoq.

Siulersuisut Tasiortap matunissaanik aalajangertariaqalernerat pingaarnertut peqquteqarpoq, Namminersorlutik Oqartussat ukiuni kingullerni marlunni suliniutinut aningaasat tapiissutigisartagaat annikilliartuinnarmata, qinnutigisartakkat affaat ataallugit annertussuseqalersimallutik.

- Namminersorlutik Oqartussat nalunaarutigisimavaat peqatigiiffiup siunissami annertunerusunik tapiiffigineqartarnissani naatsorsuutigisinnaanngikkaa, Kisea Bruun ilisimatitsivoq.

Tasiortamiillu taamatut nalunaaruteqarneq aningaasanik tapiissuteqartartut allat peqatigiiffimmut tapersersuillutik tapeerusunnerannut sunniuteqartussaasoq oqaluttuarineqarpoq. Tapiisartummi Namminersorlutik Oqartussat Tasiortap ingerlanneqarneranut suliuniutinullu tapiissuteqarnermikkut peqataanerat tapiissuteqarnissaminnut toqqammavigerusuttarsimammassuk.

- Tasiortap ingerlaavartumik inersimasunut kinguaassiuutitigut innarlerneqarsimasunut ikiorsiinissamut neqeroorutini pitsanngorsaaviginiartarsimavai aammalu nutaatut kinguaassiuutitigut atornerluisartut tarnit pissusaanik ilisimasalinnit katsorsarneqartalernissaat neqeroorutigisimallugu, Kisea Bruun oqaluttuarpoq.