Tasiorta
‘Tasiorta’ oqartussanit illuatungilerneqarpoq
Peqatigiiffiup tapersersuisup ’Tasiorta’-p Namminersorlutik Oqartussanit tapiissutinik naatsorsuuteqaqqissinnaanginninni tunngavilersuutigalugu matunerarnera Namminersorlutik Oqartussanit maanna ilumuunnginnerarneqarpoq
Sermitsiaq.AG-mit marlunngormat oqaluttuaraarput kinguaassiutimikkut atornerlunneqarsimasunut tapersersuilluni peqatigiiffik ‘Tasiorta’ januaarip naanerani matusussanngortoq. Tamannalu peqatigiiffiup nalunaaruteqarneratut Namminersorlutik Oqartussat siunissami tapiissuteqaqqinniannginneranik patsiseqarpoq.
- Namminersorlutik Oqartussat nalunaarutigisimavaat peqatigiiffiup siunissami annertunerusunik tapiiffigineqartarnissani naatsorsuutigisinnaanngikkaa, peqatigiiffiup siulittaasua Kisea Bruun marlunngornermi taama ilisimatitsivoq.
Maannali Namminersorlutik Oqartussat ilisimatitsipput ‘Tasiorta’ allakkami septembarip 25-anni 2014-imeersumi apeqquteqaateqartoq peqatigiiffiup naatsorsuutigisinnaaneraa Ilaqutariinnermut Inatsisinillu Atuutitsinermut Naalakkersuisoqarfimmit 2015-imi tapiissutisinissaq. Allakkamilu septembarip 30-anni 2014-imeersumit Naalakkersuisoqarfik ima akissuteqarsimasoq:
- Tamanna Naalakkersuisoqarfiup akisinnaanngilaa, 2015-imut Aningaasanut Inatsimmut aningaasanik immikkoortitsinerit tapiissutinik akuersissuteqarnissamut apeqqutaammata. Tamatuma saniatigut tapiiffigitinnissamut qinnuteqaatinut tiguneqartunut atatillugu paasissutissat Ilaqutariinnermut Inatsisinillu Atuutsitsinermut Naalakkersuisoqarfiup tigusai tunuliaqutaralugit tapiissutaasinnaasut aalajangiiffigineqartarput, Ilaqutariinnermut Inatsisinillu Atuutitsinermut Naalakkersuisoqarfik taama allappoq.
Taamaattumik naalakkersuisoqarfik najoqqutaralugu ‘Tasiorta’ 2015-imut tapiiffigineqassanersoq suli isummerfigineqarsimanngilaq.