Tasiilaq
´Tasiilaq tunulliunneqarunnaassaaq´
– Kanngunartuliorneruvoq isumaginninnermillu sumiginnaanerujussuulluni, tunumi illoqarfimmi tassani isumaginninnikkut suliassat taama amerlatigimmata, Demokraatineersoq Justus Hansen oqarpoq. Taassuma suliniutaasinnaasut arlallit, illoqarfimmik kivitsisinnaasut tikkuarpai
Inatsisartunut ilaasortap Justus Hansenip (D) piumasaraa Tasiilami ajornartorsiuterpassuit qaangerniarnissaannut poliitikerit qanoq iliuuseqassasut.
Taanna isumaqarpoq ingerlatsinerup ajorpallaarnerujussua pissutigalugu tunumi illoqarfik taanna imaannaanngitsunik ajornartorsiuteqalersimasoq.
Ingerlatsisut sumiginnaapput
Ajornartorsiutaasut ilagaat meeqqanut inuusuttunullu isumaginninnikkut suliassarpassuit.
– Namminersorlutik Oqartussat aamma Kommuneqarfik Sermersooq qanimut suleqatigiilertariaqarput, tassani meeqqanut inuusuttunullu isumaginninnikkut suliassarpassuit iliuuseqarfiginiarlugit, taanna tusagassiorfinnut nalunaarutikkut allappoq.'
– Kanngunartuliorneruvoq isumaginninnikkullu sumiginnaanerujussuulluni suliassat taama amerlatigimmata. Tamakkua salliutillugit suliniuteqartoqartariaqarpoq suliassarpassuit iternga tikillugu misissorlugit, taamaasilluni eqqorneqartut paasisaqartillugit inuunertillu ingerlateqqissammassuk, politikeri erseqqissaavoq, taannalu nammineq Tasiilarmiuuvoq.
Mittarfiup illoqarfik ammassavaa
Justus Hansen isumaqarpoq Tasiilami innuttaasut nunap sinnerani innuttaasutulli periarfissaqartinneqassasut, taamaattumillu piumasaraa illoqarfik mittarfittaartinneqassasoq.
– Mittarfik arlalinnik iluaqutissartaqassaaq. Tasiilaq nunap sinneranut qaninnerulersissavaa, minnerunngitsumillu taamatullu pingaaruteqartigisumik, mittarfiup Tasiilaq nunarsuup sinneranut qaninnerulersissavaa, Islandimut qanittunnguunini pissutigalugu, Justus Hansen tikkuaavoq.
Ilinniagaqarfimmik pilersitsigitsi
Tamanna peqatigalugu illoqarfimmi efterskoleqalernissaa tapersersorpaa. Tamatumunnga tunngavilersuutigaa Tasiilami efterskoli nunanik tdamalaanik samminninnissamut tunngavissaqarluartoq.
– Oqaatsit sammineqarsinnaapput, tuluit oqaasiinik sakkortusisamik atuartitsilluni. Tamanna tapertalerneqarsinnaavoq Islandikkoorluni nunanut tuluttut oqaaseqarfiusunut paasisassarsiorluni angalasarnernik. Taamatut sammisaqartitsinikkut inuusuttut ilinniagaqarfinnut, tuluit oqaasiinik piginnaasaqarluarnissamik piumasaqarfiusunut, ingerlaqqinnissaminnut piareersarneqassapput, Demokraatineersoq Justus Hansen oqarpoq, erseqqissarlugulu ´Tasiilaq tunulliunneqarunnaartariaqartoq´.