piitsuuneq

Tasiilaq, Qaanaaq Upernavillu piitsoqarnerpaasut

Nunap immikkoortuisa akornanni aningaasaqarnikkut atugarliortut assigiinngitsorujussuupput.

Tasiilap eqqaani najugaqartut nunatsinni piitsut amerlanerpaapput. Naatsorsueqqissaartarfimmit kisitsisit nutaat takutippaat.

Qulerarterutaanik amerlanerusut, tassa 11 procentit aningaasaatikilliortutut oqaatigineqarput, tassa imaappoq, ukiumut 76.000 koruunit ataallugit atoriaannarnik isertitaqarsimasut. Tasiilarlu minnerpaamik ukiuni tallimani alianartumik qaffasinnerpaamik inissisimaffeqarpoq. Ineriartornerat 2012-miilli amerleriaateqalaarsimapput.

Assigiinngissutaasut annertuut
Tamatuma akerlianik 'illoqarfimmi sanilerisami' Ittoqqortoormiini piitsut 4 procentiinnaapput. Tamanna Nunatsinni agguaqatigiinnermut naleqquttumik inissisimavoq.

Tasiilap kingorna Qaanaap aamma Upernaviup eqqai tulliupput. Taakkunani 9 procentit piitsuupput. Tassanilu eqqaamiuni Uummannami pitsaanerujussuunera takuminarpoq, tassani kisitsisit 2 procentiinnarmiipput.

Kangaatsiami ilorraap tungaanut aallartoqartoq
Tasiilaq, Qaanaaq aamma Upernavik malunnaatilimmik nikingapput. Taakkununnga Kangaatsiaq tulliuppoq, tassani poiitsut 6 procentiupput. Kangaatsiamilu ersarissumik pitsaassumik ineriartorfiuvoq. 2012-imi tassani piitsut Tasiilamiittunit amerlanerupput, tassa 10 procentiullutik. Tassanngaanniilli kisitsisit appariartuinnavipput.

Ataatsimut isigalugu piitsut amerlassusaat nunaqarfinni illoqarfinnit amerlanerusarput, tassa nunaqarfinni 8 procentiullutik illoqarfinnilu 3 procentiullutik. Naatsorsueqqissaartarfiulli isertitat kisitsisinngorlugit takusassiarineqarnerini ilanngussinnaanngisaanik peqartoq maluginiaqqusivoq. Ingammik inuiaqatigiinni ikinnerusuni aalisarneq piniarnerlu nammineq nerisassaqarneq ilaqutariit aningaasaqarnerannut annertuumik sunniuteqartarpoq.

Naatsorsueqqissaartarfiup ukiuni pingasuni minnerpaamik agguaqatigiisillugu isertitanit 50 procentimik ikinnerusunik isertitaqartut 'aningaasaatikilliortutut' uani naatsorsuinermi oqaatigaat. Agguaqatigiisillugu isertitat tassaapput, innuttaasut affaat isertitaqarnerusut affaallu isertitakinnerusut. Tamanna 2016-imi 152.000 koruunimi inissisimavoq.

Powered by Labrador CMS