mittarfiit
Tasiilaq mittarfittaarusuppoq
Tasiilaq mittarfittaartoqaraluarpat Kulusummut angalanerit 1.640-rut sipaarneqassangaluarput. Illoqarfiullu suliffinnik amigaateqaqisup iluaqutigissangaluarpaa.
- Tasiilaq mittarfittaarnissaminut naammattorsuarmik utaqqereerpoq, Justus Hansen (D) Naalakkersuisumut apeqquteqaateqarnermini taama erseqqissaavoq.
Piviusuuvoq Tunumut angalasartut amerlanersaat Tasiilamukartuusarmata, Justus Hansen apeqquteqaatini taama erseqqissarpai. Tasiilami mittarfiliortoqarpat piffissamik sipaaginnarani avatagiisimut mingutsitsineq annikillisinneqassaaq.
- Eqqumiigiuaannarnikuuara 2011-mili Tasiilami timmisartunut suluusalinnut mittarfissaq pillugu suliaq taama annikitsigisumik nikeriarsimammat, Inatsisartuni ilaasortaq allappoq.
Tasiilap isiginngitsuusaarneqarnera paasisinnaanngilaa
Paasisinnaanngilaa sooq Tasiilami mittarfiliornissap Kalaallit Airport A/S-p ataani Naalakkersuisut suliakkiissutaannut ilaannginnersoq. Suliffeqarfiup ilaatigut Nuummi mittarfiup tallilerneqarnera aningaasaleeqataaffigissavaa.
Justus Hansenip nutaamik mittarfiliornissaq piffissami sivikitsuaqqami pisinnaanngitsoq ilisimavaa. Taamaammallu Naalakkersuisut 2018-mut Aningaasanut Inatsisissamut atatillugu makku immikkut aningaasaliiffigisinnaagaat siunnersuutigalugu:
Unnuakkut ikumasartussanik qullernik ikkussuinissamut kiisalu Tasiilami Heliportip immikkut sulisoqartalernissaanut, isumannaarumallugu ilaasut aamma takornariat Kulusummiik Tasiilamut sukkanerusumik tikittalersinnaanissaat.