Tasiilap sanaartugassanik suliaqartartutuaa akiliisinnaajunnaarpoq

Kalaallit Nunaanni Eqqartuussiviit pigisanik agguaassisarnermut eqqartuussiviata suliffeqarfik Tasiilami sanaartugassanik suliaqartartoq Viking Greenland pingasunngornermi akiliisinnaajunnaartoq nalunaarutigaa.

Nammineq akiliisinnaajunnaartoq
Aningaasalersuisarfimmi Namminersorlutik Oqartussanit pigineqartumi Greenland Venturemi pisortaq Karsten Høy, suliffeqqarfimmik 49 procentimik piginnissimasoq, suliffeqarfiup siulersuisuisa akiliisinnaajunnaarneq nammineq aalajangigarigaat ilisimatitsivoq.

- Nassuerutigisariaqarparput suliffeqarfik ukiuni marlunni kingullerni aningaasaqarniarnikkut ajornartorsiuteqarsimanera. Naak suliffeqarfik sulianik arlalinni Tasiilami ingerlataqaraluartoq, pitsannguinissamut naammassimanngilaq. Aammalu nutaanik aningaasaliisussanik nassaartoqarsinnaasimanngilaq. Naggataatigullu siulersuisut taamaatitsisariaqarsimapput, Karsten Høy nassuiaavoq.

Siulersuisuni sisamanik inuttaqartumi, Greenland Venture marlunnik siulersuisuutitaqarpoq, ilaatigut siulersuisuni siulittaasoq. Aamma aningaasaliisarnermut suliffeqarfik 2008-mi suilffeqarfiup pilersinneqarnerani peqataasimavoq.

Qaqutigoortoq
- Qujanartumik suliffeqarfiit aningaasaliiffigisagut qaqutigut akiliisinnaajunnaarnerat pisarpoq. Kisiannili inuussutissarsiornermik siuarsaanermik tapersiinermi nalorninartut atugassarititaasut ilagivaat. Piginneqataasutut aaqqiiviginiarniarlugu annertuumik suliaqarnikuuvugut. Kisianni naggataatigut Viking Greenland ingerlanneqaannarnissaa piviusorsiunngitsoq nassuerutigisinnaavarput, pisortaq erseqqissaavoq.

Taassuma ilanngullugu oqaatigaa, Greenland Venture 2012-imi iliuusissanut periaasertik allanngortissimagaa taamaalillutik siammasissumik aningaasaliisarunnaarlutik, suliffeqarfiillu avammut tunisinermik annertusaaniartut imaluunniit eqqussuinermik annikillisaaniartut ukkatarinerulerlugit.

Tamannalu peqqutigalugu aningaasalersuisarfiup suilffeqarfimmut tassuna aningaasaliissuteqarnissaa akilersinnaanngilaq.

Millioninik amigartooruteqartut
Viking Greenlandip 2014-imi naatsorsuutai kingulliit naapertorlugit 10,2 millionit koruuninik amigartooruteqarpoq, suliffeqarfiullu nammineq aningaasaatai 1,9 millionit koruuninik negativiullutik.

Kaaviaartitat 45,5 millionit koruuniupput.

Eqqartuussissuserisoq Peter Schriver, Nuummi Nuna Advokatineersoq akiliisinnaartumut suliarinnittussatut toqqarneqarpoq.