MayDay
Tasiilap eqqaani ajunaalernermik kalerrisaarisut
Arfininngormat Tasiilamit ajunaalernermik kalerrisaarineq nipikitsumik tusaaneqarsimavoq. Politiit ikioqqupput
Arfininngormat aggustip 17-ianni nalunaaqutaq 14.41 Tasiilami Politiit nalunaarfigineqarput VHF radio-mi kanal 8-mi ajunaalernermik kalerrisaarineq tusaaneqarsimasoq. Taanna pujortuleeqqamit Tasiilameersumit tamaaniittumit tusaaneqarsimavoq.
– Mayday-mik kalerrisaarisoq nipikitsumik tusaasimavaa. Oqaatigineqarsimanngilarli suminngaanniit kinalu kalerrisaarinersoq, Tasiilami Politiini pigaartoq Martin K. Hjorth tusagassiorfinnut nalunaarutikkut allappoq.
Politiit angallataat Sisak III ingerlaannaq Tasiilamit aallartinneqarpoq, malussaranili. Tamatuma saniatigut Aasiaat Radio-tigut Pan-Pan-imik kalerrisaarisoqalerpoq. Inuk inuilluunniit VHF-ikkut kanal 8-kut kalerrisaarisimasut politiit tusarfigerusuppaat.
Imaluunniit Tasiilap eqqaani angalasunik suli angerlarsimanngitsunik maqaasineqartunik, taava Tasiilami politiit attaveqarfigissavatit. Tasiilami Politiit normoraat 701224.